QR Mádenıet jáne sport mınıstrligi dopıngke baılanysty jaǵdaı boıynsha óz ustanymyn bildirdi
«Búgin Qazaqstannyń aýyr atletıka federatsııasy Halyqaralyq aýyr atletıka federatsııasynan (IWF) málimdegendeı tórt qazaqstandyq sportshy - Ilıa Ilın, Zýlfııa Chınshanlo, Maııa Maneza men Svetlana Podobedovalardan 2012 jyly Londondaǵy Olımpıada oıyndary kezinde alynǵan synamalardyń aldyn ala analızderiniń qorytyndylaryna baılanysty aýyr atletıkadaǵy kez kelgen is-áreketten ýaqytsha shettetilgenin habarlaǵan bolatyn.
Tergeý qorytyndysy boıynsha Halyqaralyq aýyr atletıka federatsııasy sportshylardyń jarysqa qatysýy nemese sporttan belgili bir merzimge shettetilýi týraly túpkilikti sheshimdi shyǵarady. Sportshylardyń 2016 jylǵy Rıo-de-Janeırodaǵy Olımpıada oıyndaryna qatysý máselesi de ashyq kúıinde bolmaq. Óıtkeni, tekserý aıaqtalǵansha jáne HOK tártiptik komıssııasynyń otyrysy bolǵanǵa deıin bizdiń sportshylarǵa qatysty qandaı da bir shara týraly eshqandaı uıǵarym engizile almaıdy», delingen habarlamada.
Sondaı-aq, Qazaqstan Respýblıkasy Mádenıet jáne sport mınıstrligi ózine alǵan halyqaralyq mindettemelerge sáıkes dopıngke qatysty "nóldik" shydamdylyq saıasatyn ustanady. Degenmen, barlyq is-áreketter ornatylǵan protsedýralarǵa sáıkes júrgizilýi kerek dep sanaıdy.
Óz kezeginde mınıstrlik Qazaqstan sportyndaǵy dopıngpen kúres jónindegi baǵdarlamanyń júzege asýyn baqylaýdy kúsheıtip, elimizdiń Ulttyq Olımpıadalyq komıteti, Ulttyq dopıngke qarsy ortalyǵy jáne táýelsiz antıdopıng komıssııasymen birlesip qazaqstandyq aýyr atletterdiń dopıngke qarsy erejelerdi buzý oqıǵalaryn tekserýdi júrgizbek.
Osy másele boıynsha tergeý aıaqtalyp jáne ýákiletti ınstantsııa túpkilikti sheshim shyǵarǵan kezde ǵana qandaı da bir túsinikteme berý múmkin bolmaq.