QR Mádenıet jáne sport mınıstri A. Muhamedıuly B. Shúmenovti WBA tujyrymy boıynsha álem chempıony atanýymen quttyqtady

ASTANA. QazAqparat - Qazaqstan Respýblıkasy Mádenıet jáne sport mınıstri Arystanbek Muhamedıuly kásipqoı boksta WBA tujyrymy boıynsha birinshi aýyr salmaqta álem chempıony atanǵan otandasymyz Beıbit Shúmenovti quttyqtady. Bul týraly QR MSM sport komıtetinen habarlady.

«Sizdi jarqyn jeńisińizben shyn júrekten quttyqtaýǵa ruqsat etińiz! Bul joly taǵy bir márte Qazaqstannyń atyn álemge máshhúr etip, elimizdiń er ulany ekenińizdi dáleldedińiz. Siz jartylaı aýyr salmaqta álem chempıonysyz, endi oǵan WBA tujyrymy boıynsha birinshi aýyr salmaqtaǵy álem chempıonynyń beldigin qosa uttyńyz. Qazaqstan boksshylary arasynda alǵashqy bolyp eki salmaq dárejesinde chempıon atanyp otyrsyz, bul biz úshin úlken mártebe. Denińizge saýlyq, otbasyńyzǵa amandyq tileı kele, elimizdiń kók baıraǵyn asqaqtatyp, jeńisti jolyńyzdyń jalǵasa berýine tilektespin», - delingen mınıstrdiń quttyqtaý hatynda.

Esterińizge sala keteıik, ótken senbi 21 mamyr kúni qazaqstandyq boksshy Beıbit Shúmenov Las-Vegas qalasynda 12 raýndtyq kezdesýde amerıkalyq Djýnıor Raıtty 10-shy raýndta tehnıkalyq nokaýtpen tize búktirip, WBA nusqasynyń birinshi aýyr salmaqtaǵy turaqty chempıony tıtýlyn jeńip aldy. Endi Beıbit Shúmenov jáne Reseı bylǵary qolǵap sheberi Denıs Lebedev aldaǵy 120 kún ishinde ózara jekpe-jek uıymdastyrýy kerek.