QR Qorǵanys mınıstrliginde sybaılas jemqorlyqty shekteý máselesi talqylandy

ASTANA. QazAqparat - QR Qorǵanys mınıstriniń orynbasary Ábilqaıyr Sqaqovtyń tóraǵalyǵymen QR Qarýly Kúshterindegi sybaılas jemqorlyqqa qarsy is-qımyl týraly zańnamanyń oryndalýyn baqylaý jónindegi komıssııanyń kezekti otyrysy ótti.

Bul jaıynda QR Qorǵanys mınıstrliginiń baspasóz qyzmetinen málim etti, dep habarlaıdy QazAqparat tilshisi.

Keńes barysynda Qorǵanys isteri jónindegi departamentterge tájirıbelik kómek kórsetý, olardyń qyzmetteriniń tıimdiligin arttyrý jáne sybaılas jemqorlyqtyń qaýip-qaterlerin joıý jospary qaraldy. Jıynda Uıymdastyrý-jumyldyrý jumystary departamenti bastyǵynyń mindetin ýaqytsha atqarýshy, polkovnık Ardaq Quqatov baıandama jasady.

Qorǵanys mınıstrligimen iske asyrylyp jatqan sybaılas jemqorlyqqa qarsy saıasat aıasynda Almaty oblysynyń QІD úlgisinde «Azamattarǵa arnalǵan áskerı komıssarıat» jobasy iske asyrylatyn bolady. Onyń maqsaty jergilikti áskerı basqarý organdarynyń qyzmetinde ishki jáne syrtqy sybaılas jemqorlyq qaterlerin barynsha azaıtý, barlyq sanattaǵy azamattardy áskerı esepke alý máselelerin tsıfrlandyrý, Qorǵanys mınıstrliginiń memlekettik qyzmetter kórsetýi bolyp tabylady.

Qorǵanys mınıstriniń orynbasary keńeske qatysýshylardyń nazaryn berilgen tapsyrmalardy tyńǵylyqty oryndalý mańyzdylyǵyna aýdardy. Sebebi, atalǵan jobanyń nátıjeleri ári qaraı ózge de bólimshelerdiń qyzmetin jetildirý úshin paıdalanylady. Otyrys sońynda JÁBO júıesin qalpyna keltirý, olardyń qyzmetiniń barlyq baǵyttaryn qaıta júkteý boıynsha usynymdar berildi.