QR Qorǵanys mınıstri qaýipsizdik máseleleri boıynsha Beıjiń forýmyna qatysýda

BEIJІŃ. QazAqparat – Qytaıda «Sıanshan» qaýipsizdik máseleleri boıynsha IX Beıjiń forýmynyń ashylýy ótti. Sharaǵa qazaqstandyq taraptan QR Qorǵanys mınıstri Nurlan Ermekbaev bastaǵan delegatsııa qatysýda, dep habarlaıdy QazAqparat.

Qorǵanys mınıstrliginiń baspasóz qyzmetinen málim etkendeı, bıylǵy jylǵy forýmnyń taqyryby - halyqaralyq tártipti saqtaý jáne Azııa-Tynyq muhıty óńirinde beıbitshilikti ilgeriletý.

«Búgin alǵashqy plenarlyq otyrys ótti. Onda qorǵanys vedomstvolarynyń ókilderi iri derjavalardyń qarym-qatynastary men halyqaralyq tártipti talqylady. Forým aıasynda barlyǵy tórt plenarlyq otyrys ótedi. Onyń barysynda qatysýshylar jahandyq qaýipsizdik, áskerı saladaǵy halyqaralyq baqylaý júıesi jáne basqa da máselelerdi talqylaıdy», - delingen habarlamada.

Odan basqa, qatysýshylar «CATIC» qytaı ulttyq aeroǵarysh ımporttyq-eksporttyq korporatsııasyna jáne qosalqy bólshekterdi saqtaýǵa arnalǵan avtomattandyrylǵan qoımaǵa baratyny josparlanǵan.