QR Qorǵanys mınıstri Imanǵalı Tasmaǵambetov kezekten tys saılaýda daýys berdi

ASTANA. QazAqparat - Qazaqstan Respýblıkasynyń Qorǵanys mınıstri Imanǵalı Tasmaǵambetov saılaý ýchaskesine kelip, barlyq deńgeıdegi máslıhattar men partııalyq tizim boıynsha usynylǵan QR Parlamenti Májilisi depýtattarynyń kezekten tys saılaýynda daýys berdi. Bul týraly vedomstvonyń baspasóz qyzmeti habarlady.

QR Qorǵanys mınıstri Imanǵalı Tasmaǵambetov Nazarbaev ýnıversıtetinde uıymdastyrylǵan № 97 saılaý ýchaskesinde óz azamattyq paryzyn oryndady.

Kezekten tys saılaýda daýys berýge QR Qarýly Kúshteriniń ókilderi men olardyń otbasy músheleri qatysýda. Olardyń arasynda Qorǵanys mınıstrligi, Bas shtaby men QR Qarýly Kúshter qurylymdyq bólimsheleriniń, ortalyq baǵynystaǵy bólimder men mekemelerdiń, QR QK Qurlyq áskerleri, Áýe qorǵanysy kúshteri, Áskerı-teńiz kúshteri áskerı bólimderiniń, áskerı oqý oryndary men jergilikti áskerı basqarý organdarynyń áskerı qyzmetshileri bar.

Qazaqstandyq armııanyń áskerı qyzmetshileri azamattyq boryshty oryndaý, tańdaý jasaý jáne árbir daýystyń mańyzdy ekenin jete túsinedi. Sondyqtan QR Qarýly Kúshteriniń barlyq áskerı bólimderi, qurylymdyq bólimsheleri men mekemeleri jappaı kezekten tys saılaýǵa belsene qatysty.