QR Qorǵanys mınıstri Gvardııalyq garnızonǵa jumys saparymen bardy

ASTANA. QazAqparat - QR Qorǵanys mınıstri Nurlan Ermekbaev Gvardııalyq garnızonnyń qurylymdary men bólimsheleriniń daıyndyǵyn oqý dabyly boıynsha tekserdi, dep habarlaıdy QazAqparat tilshisi Qorǵanys mınıstrliginiń baspasóz qyzmetine silteme jasap.

Tekserý barysynda Qorǵanys mınıstri dabyl boıynsha jeke quramnyń is-áreketterin baǵalady. Ásirese, áskerı tehnıkalardy belgilengen aýmaqtarǵa ýaqytyly jetkizý, sondaı-aq jaýyngerlik bólimshelerdiń úılesimdi áreketteri erekshe baqylaýǵa alyndy.

Qorǵanys vedomstvosynyń basshysy brıgada komandıriniń dabyl boıynsha qabyldanǵan sharalary, baǵynyshty bólimshelerdiń óz mindetterin oryndaýy jáne komandalyq qolbasshylyqtyń jaýyngerlik daıyndyqty arttyrý jónindegi qabyldaǵan sharalary týraly baıandamasyn tyńdady.

Tekserý barysynda jeke quram jabdyq pen qarýdy jaýyngerlik jaǵdaıǵa keltirý, oq-dárilerdi júkteý jáne oq-dárilerdi jaýyngerlik tehnıkaǵa ornalastyrý boıynsha normatıvterdi oryndady.

Qorǵanys mınıstri áskerı bólimderdiń ınfraqurylymdyq nysandaryn, polıgondardyń oqý materıaldyq-tehnıkalyq bazasyn, áskerı qalashyqty, garnızonnyń áleýmettik, mádenı jáne demalys nysandaryn tekserdi. Tekserý qorytyndysy boıynsha Qorǵanys mınıstri jaýyngerlik daıyndyqty odan ári jetildirýdi jáne Elbasynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýyna sáıkes áskerı qyzmetkerlerdiń áleýmettik jaǵdaıyn jaqsartýǵa baǵyttalǵan birqatar mindetter qoıdy.