QR Konstıtýtsııasy kúni Arys qalasynda erekshe merekelendi
Tuńǵysh ret Ál-Farabı alańynda Nur-sultan qalasyndaǵy QR Qarýly Kúshteriniń Ulttyq áskerı-patrıottyq ortalyǵy ónerpazdarynyń qatysýymen merekelik kontsert ótti, dep habarlaıdy QazAqparat tilshisi.
Ónerpazdardy bastap kelgen QR Qarýly Kúshteri Bas shtabynyń orynbasary, general-maıor Muhamedjan Talasov barsha arystyqtardy Konstıtýtsııa kúnimen quttyqtap, aq tilegin jetkizdi. Sondaı-aq, merekelik sharaǵa qala ákimi Murat Qadyrbek pen kásiporyn basshylary, QR Qorǵanys mınıstri orynbasary, general-maıor B.Qurmanbaev pen QR QK bas shtab bastyǵynyń orynbasary general-maıor Aldabergenov qatysty.
Túrkistan oblysy qorǵanys isteri jónindegi departamenti, Arys qalasy qorǵanys isteri jónindegi bólimi men Arys garnızonyndaǵy əskerı bólim qyzmetkerleri, Respýblıkalyq «Aıbyn» áskerı-patrıottyq saıystyń jeńimpazdary, «Jas sarbaz» jastar qozǵalysynyń Arys qalasyndaǵy əskerı patrıottyq klýbynyń músheleri men qala turǵyndary da boldy. Beıbit kúnniń besigin terbetken áskerı ónerpazdardyń áserli kontserti jurtshylyqqa jiger berdi. Oryndalǵan árbir shyǵarmany erekshe qabyldaǵan qala turǵyny óz rızashylyqtaryn bildirip jatty.
Merekelik kontsert sońynda QR Qarýly Kúshteriniń Ulttyq áskerı-patrıottyq ortalyǵy ónerpazdaryna qala ákimi Qadyrbek Murat Bolatulynyń yqylas gúli tabys etildi. Ata Zańnyń aıtýly merekesi kúni QR Qarýly Kúshteriniń Bas shtab bastyǵynyń orynbasary, general-maıor M.Talasov, QR QR ardagerleri RQB Túrkistan oblysy fılıalynyń tóraǵasy, zapastaǵy podpolkovnık B.Aldabergenov, Túrkistan oblysy Qorǵanys isteri Departament bastyǵynyń orynbasary J.Kýlderbaev Respýblıkalyq «Aıbyn»áskerı-patrıottyq jıynǵa qatysyp kelgen arystyq «Barys» jáne «Arys» komandalarymen kezdesip, komandaǵa jetekshilik etken AÁD pániniń ustazdary M.Súıindikov pen E.Aımurzaevty «Qarýly kúshterdegi qyzmeti úshin» medalimen marapattady.
Bul kúni «Jas sarbaz» balalar-jasóspirimder áskerı-patrıottyq qozǵalysynyń músheligine S.Adambekov mektebiniń 7-synyp oqýshysy Qaıyrbaı ıÝsýf Panabekuly qabyldanyp, saltanatty túrde ant berdi. Oqýshynyń ákesi Qaıyrbaı Panabek 24 maýsymda bolǵan tótenshe jaǵdaı kezinde qaza bolǵan edi.