QR KKM ázirge Ýkraınanyń áýe keńistigin paıdalanbaý týraly eskertti

ASTANA. QazAqparat - QR Kólik jáne kommýnıkatsııa mınıstrligi qazaqstandyq jáne sheteldik tranzıttik áýe kompanııalarǵa Ýkraınanyń áýe keńistigin paıdalanbaý týraly eskertti. Bul týraly búgin QR KKM Azamattyq avıatsııa komıteti tóraǵasynyń orynbasary Serik Muhtybaev aıtty

«Ózderińiz bilesizder, Ýkraınanyń áýe keńistiginde malaızııalyq áýe kompanııasynyń ushaǵy apatqa ushyrady. Qazirgi kezde Ýkraına tarapynan arnaıy komıssııa qurylyp, tıisti quzyrly organdar tergeý amaldaryn júrgizýde. Biz osy apat saldarynan qaza bolǵandardyń týǵan-týysqandaryna qaıǵyryp kóńil aıtamyz», - dep toqtalǵan ol: «Ýkraına áýe keńistigi arqyly qazaqstandyq áýe kompanııalarynyń ushýy máselesine toqtalatyn bolsaq, keshegi apattyń naqty sebepteri anyqtalǵansha qazirgi kezde biz osy eldiń áýe keńistigin paıdalanbaý týraly eskertýler jasadyq. Keshe «Eır Astana» Ýkraına aýmaǵy arqyly ushýdy toqtatty. Osy sátte tıisti konsýltatsııalar júrgizilip jatyr», - dep atap ótti.

Onyń sózine qaraǵanda, jaqyn arada eýropalyq qadaǵalaý, Ýkraınanyń avıatsııalyq bıligi, Halyqaralyq avıatsııalyq komıteti tarapynan atalǵan eldiń áýe keńistigin paıdalaný múmkindigi turǵysynda sheshimin beredi.

Onyń aıtýynsha, Ýkraına aýmaǵy arqyly qazaqstandyq áýe kompanııalary ishinde «Eır Astana» ǵana ushqan jáne keıbir kezderde charterlik reıster jasalyp otyrǵan.