QR Qaýipsizdik keńesine qatysty zań jobasy bılik tranzıtimen baılanysty emes – mınıstr

ASTANA. QazAqparat - QR Ádilet mınıstri Marat Beketaev elimizdiń Qaýipsizdik keńesi quzyretin kúsheıtetin zań jobasyn qabyldaý qajettigine qatysty pikir bildirdi, dep habarlaıdy QazAqparat.

Atalǵan mınıstrliktiń keńeıtilgen alqa májilisinen keıin Marat Beketaev BAQ ókilderine suhbat berdi. Jýrnalıster Qaýipsizdik keńesi qyzmetiniń máselelerine arnalǵan zań jobasyna qatysty keıbir sarapshylardyń «bılik tranzıtine daıyndyq» úshin jasalyp jatyr degen pikirleri bar ekendigin aıtty. Olar mınıstrden atalǵan máselege oraı pikir bildirýdi surady.

«Men sarapshylardyń pikirimen kelispeımin jáne muny josparly jumys sanaımyn. Bizde konstıtýtsııalyq reforma júrgizildi. Atalǵan konstıtýtsııalyq reformanyń aıasynda Elbasynyń barlyq ýaqytta da Qaýipsizdik qyzmetin basqaratyndyǵy aıqyndalǵan. Bul fakti Elbasynyń aıryqsha mártebege, halyqtyń aıryqsha senimine ıe ekendigin bildiredi. Buǵan qosa, qazirgi terrorızm men ekstremızm qaýpi bar kezde halyq úshin, turǵyndar úshin, elimiz úshin turaqtylyq faktory barynsha mańyzdy. Sondyqtan sóz elimizdegi turaqtylyqty qamtamasyz etetin mehanızmderdi kúsheıtý jaıynda bolyp otyr», - dedi mınıstr.

Sonymen qatar Marat Beketaev Elbasynyń joǵary bedeliniń arqasynda elimiz óńirdegi turaqtylyqty da qamtamasyz etip otyrǵandyǵyn basa aıtty.

Aıta keteıik, taıaýda QR Parlamentiniń Májilisi Qaýipsizdik keńesi qyzmetiniń máseleleri jónindegi zań jobasyn qaraýyna alǵan bolatyn. Zań jobasyn elimizdiń Ádilet mınıstrligi ázirlegen.