QR kásipodaqtary qaýymdastyǵynyń 20 jyldyǵyna arnalǵan ǵylymı-tájirıbelik konferentsııa ótti
Jıynda kásipodaqtar qaýymdastyǵy Bas keńsesi men QR Parlamenti, saıası partııalar men qozǵalystar, TMD memleketteri ulttyq kásipodaq ortalyqtary jáne basqa uıym ókilderinen quralǵan jalpy sany 300-ge jýyq qatysýshy boldy. Sonymen qatar, elimizdiń respýblıkalyq, oblystyq jáne aýmaqtyq kásipodaq tóraǵalary da qatysty.
Konferentsııanyń ashylý saltanatynda QR Premer-Mınıstri Kárim Másimovtiń quttyqtaýy oqylyp, Qazaqstan Respýblıkasy kásipodaqtary qaýymdastyǵynyń tóraǵasy Sııazbek Muqashev baıandama jasady.
«Bul basqosýymyzda TMD jáne shetel memleketteri kásipodaqtarymen tyǵyz baılanys ornatý, jumys berýshiler men eńbekkerler arasyndaǵy qarym-qatynastardy kúsheıtý joldary talqylanyp jatyr. Qazirgi tańdaǵy kúrdeli máselelerdiń biri - jumysshylarǵa tıisti deńgeıde jalaqy berý. Bul jaǵdaıda jumysshylardyń eńbekaqysy jumys berýshiniń deńgeıine qaraı emes, standarttarǵa saı tólený kerek. Biz konferentsııada osy máselelerdi sheshý joldaryn qarastyramyz», - dedi ol. Onyń aıtýynsha, qazirge deıin 80-ge jýyq otandyq kásipodaqtyń jalaqy berý júıesine ózgeris engizilgen.
Konferentsııaǵa qatysýshy QR kásipodaqtary qaýymdastyǵy jastar keńesiniń jáne Almaty qalalyq «Parasat» kásipodaǵynyń tóraǵasy Danat Jańataevtyń aıtýynsha, Dúnıejúzilik kásipodaqtar uıymy ótkizetin semınar-trenıngter otandyq kásipodaqtar qyzmeti sapasynyń artýyna úlken septigin tıgizip otyr. Sonymen qatar, Qazaqstanda kásipkerlik jumystary men damýyna zańnamalyq turǵyda basqa TMD elderine qaraǵanda jaqsy jaǵdaı jasalǵan.
«Elimizdiń kásiporyndarynda KSRO zamanynan qalǵan eski tehnıkalardy zamanaýı qurylǵylarmen aýystyrý qarqyndy júrýde. Onyń óndiristik tıimdiligi joǵary bolǵanymen, jumysshylardyń sany azaıyp ketý qaýpi bar. Sondyqtan sheteldik tehnologııalardy jappaı qoldanysqa engizýde onyń qyzmet etý sapasynyń joǵarylyǵyna asa mán beremiz», - deıdi S. Muqashev.
Jıyn qorytyndysynda kásipkerliktiń damýy men jumysshylar jaǵdaıynyń jaqsarýyna qatysty qujattar qabyldandy. Sonymen birge, qatysýshylarǵa Kásipodaqtar qaýymdastyǵynyń 20 jyldyq qurmetine arnalǵan estelik belgiler tabys etildi.