QR Kásipodaqtar federatsııasy janynan áleýmettik medıatsııa jónindegi keńes quryldy

ASTANA. QazAqparat - Búgin elordada QR Kásipodaqtar federatsııasy janyndaǵy áleýmettik medıatsııa jónindegi keńestiń birinshi otyrysy ótti, dep habarlaıdy QazAqparat.

Otyrys barysynda sóz sóılegen QR Kásipodaqtar federatsııasynyń tóraǵasy Ábilǵazy Qusaıynov Memleket basshysy Nursultan Nazarbaev Qazaqstan halqyna arnaǵan Joldaýynda  adamı kapıtaldy damytý negizgi basymdyqtardyń biri retinde ataǵandyǵyn eske salyp ótti.

«Bul protseste áleýmettik medıatsııa tetikterin  engizý qadamdary  mańyzdy ról atqarady. Meniń oıymsha, bul máseleni qoǵam arasynda salmaǵy bar, óz oıyn ashyq aıta alatyn azamattarmen kelise otyryp sheshken ońtaıly bolady», - dedi ol.
 

Onyń aıtýyna qaraǵanda, áleýmettik medıatsııa jónindegi keńes eń aldymen eńbek daýlaryn sheshýmen aınalysady. Al keńestiń basty maqsaty adamnyń erkin damýy men onyń laıyqty ómir súrýin qamtamasyz etetin áleýmettik-eńbek qatynastary problemalaryn sheshý úshin dıalog alańyn qurý bolyp otyr.

Keńestiń birinshi otyrysyna Májilis depýtattary, tanymal saıasattanýshylar, azamattyq sektor ókilderi, áleýmettik jelilerdi belsendi paıdalanýshylar qatysty. Sharany uıymdastyrýshylardyń aıtýynsha, QR Kásipodaq federatsııasy ortalyqta jáne jergilikti jerlerde azamattyq sektor, áleýmettik jeliler, «qoǵamdyq pikirdiń» belsendi kóshbasshylaryn tartý arqyly «medıatorlar pýlyn» quryp, áleýmettik medıatsııa jumystarynyń belsendiligin arttyrýdy josparlaýda.