QR Kásipodaqtar federatsııasy men Qostanaı ákimdigi yntymaqtastyq Memorandýmyna qol qoıdy

QOSTANAI. QazAqparat – Qazaqstan Respýblıkasynyń Kásiptik odaqtar federatsııasynyń tóraǵasy Eraly Toǵjanov Qostanaı oblysyna jumys saparymen keldi, dep habarlaıdy QazAqparat.

Eraly Toǵjanovty aldymen oblys ákimi Arhımed Muhambetov qabyldady. Kezdesý barysynda Qazaqstan Respýblıkasynyń Kásipodaqtar Federatsııasy men oblys ákimdigi arasynda ózara yntymaqtastyq týraly Memorandýmǵa qol qoıyldy.

Memorandým aıasynda taraptar eńbek qatynastaryn retteýde jáne áleýmettik bastamalardy júzege asyrýdaǵy ózekti máseleler boıynsha ustanymdaryn aıqyndap, birlesken sharalar qabyldaýǵa kelisti.

Kezdesý barysynda oblystaǵy áleýmettik, eńbek salasynyń áleýeti talqylanyp, áleýmettik áriptestik aıasynda birlesip atqarylatyn birqatar sharalar belgilendi.

«Jumysshylardyń eńbek quqyqtaryn qorǵaý birinshi kezekte kásiporyndar men uıymdardaǵy kásipodaqtarmen júzege asyrylady. Bizdiń basty maqsat – kásipodaqtar qozǵalysynyń tiregi bolyp tabylatyn bastaýysh kásipodaq uıymdarynyń sanyn arttyrý. Qostanaı kásiporyndarynda jaǵdaı turaqty, áleýmettik paketteri tolyq, jumyskerlerge jaǵdaı qarastyrylǵan. Osy sebepti aımaq basshylyǵyna alǵys bildiremin. Qostanaı oblysynda 120 myńnan astam adamdy qamtyp otyrǵan 1462 kásipodaq uıymy bar. Kásiporyndardyń 14%-y kásipodaqqa múshe», - dep atap ótti Kásiptik odaqtar federatsııasynyń tóraǵasy.

Jalpy, búginde ujymdyq shart boıynsha Qostanaı oblysy jaqsy kórsetkishke ıe. Jumys isteıtin 10 614 kásiporynda 6 975 ujymdyq shart bekitilgen, ıaǵnı bul 65,4%-dy quraıdy.

Aımaq basshysy Arhımed Muhambetov óńirde eńbektegi daýly máselelerdiń, sonyń ishinde jalaqy beresheginiń joqtyǵyn jetkizdi. Tek bankrottyq jarııalaý týraly sot protsesi júrip jatqan eki seriktestik bar. Biriniń bereshegi – 11 mıllıon, ekinshisiniki – 4 mıllıon teńge.

Shara barysynda kásipodaq salasyna eńbek sińirgen birqatar azamattar marapattaldy. Sonyń ishinde B.Ertaeva QRKF «Kásipodaq ardageri» belgisin, E.Býdılova, A.Esmaǵambetov, J.Qusaıynov «Kásipodaqtarǵa sińirgen eńbegi úshin» belgisin taqsa, N.Drozd Qurmet gramotasyna ıe boldy.

Eraly Toǵjanov jumys sapary barysynda myńnan astam adam eńbek etetin «SaryarqaAvtoProm» seriktestigin jáne «Bolshevıchka» tigin fabrıkasyn aralap kórdi.