QR Kásipodaqtar federatsııasy kezekten tys prezıdenttik saılaý ótkizýge qoldaý bildirdi
«Qazaqstan Respýblıkasynyń Kásipodaqtar federatsııasy Memleket basshysy Q.Toqaevtyń Qazaqstan Respýblıkasy Prezıdentiniń kezekten tys saılaýyn ótkizý týraly bastamasyn qoldaıdy. Qazaqstan Respýblıkasynyń Konstıtýtsııasy elimizdegi saıası úrdistiń tıimdi quraly retinde memlekettik bılik tarmaqtarynyń birligi men ózara úılesimdi baılanysyn, konstıtýtsııalyq zańdylyqtyń nyǵaıýyn, adamnyń jáne azamattyń quqyqtary men bostandyǵyn qamtamasyz etetin tetik. Elimizdegi saıası júıeniń damý barysy Táýelsiz Qazaqstannyń qalyptasyp, ósip-órkendeýiniń jáne nyǵaıýynyń zańdy úrdisi bolyp tabylady. Osy oraıda elimizde ótkiziletin Prezıdenttik saılaý - barsha qazaqstandyqtardyń azamattyq bostandyǵynyń ajyramas bóligi, aıqyn dáleli», - delingen federatsııa úndeýinde.
Sonymen qatar federatsııa Qazaqstannyń azamattar men qoǵamnyń ál-aýqatyn jaqsartýǵa baǵyttalǵan áleýmettik damýyn jáne úılesimdi qoǵamdyq-saıası baǵdaryn jalǵastyra beretindigine senim bildirgen. Eńbekkerlerdiń quqyǵyn qorǵaý, laıyqty eńbek úshin tıimdi sharttar qalyptastyrý, sondaı-aq áleýmettik áriptestiktiń tıimdi yntymaqtastyǵy salasyna qatysty kóptegen kókeıtesti máselelerdi sheshýdiń mańyzy zor ekendigin atap ótken.
«Bul jaýapty mıssııany zań boıynsha saılanǵan Qazaqstan Respýblıkasy Prezıdentiniń basshylyǵymen turaqtylyq, aıqyndyq jáne ashyqtyq jaǵdaıynda atqarǵan jón. Biz elimizdegi barlyq áleýmettik jaýapkershiligi joǵary, jasampaz kúshterdi Qazaqstan Respýblıkasynda barlyq halyqaralyq normalar men standarttarǵa saı ádil de ashyq saılaý ótkizýge qoldaý kórsetýge shaqyramyz!», - dep atap ótedi federatsııa.