QR «Qarjy akademııasy» AQ men DP WORLD FZE iskerlik yntymaqtastyq ornatty

ASTANA. QazAqparat - Dýbaı qalasyndaǵy Jahandyq ıslam ekonomıkalyq sammıti aıasynda 30 qazan kúni QR Qarjy mınıstrliginiń «Qarjy akademııasy» AQ prezıdenti Natalıa Korjova DP WORLD FZE basshylyǵymen kezdesti, dep habarlaıdy «QazAqparat» HAA.

Kezdesý Qazaqstan Respýblıkasynyń Birikken Arab Ámirlikterindegi Elshiliginiń qolǵabys etýimen uıymdastyryldy. Sharada Natalıa Korjova DP WOLRD FZE birinshi vıtse-prezıdenti Maha ál-Kattanımen ekijaqty yntymaqtastyq perspektıvalaryn talqylady. Taraptar Qazaqstanda, Ortalyq Azııa jáne TMD elderinde birlesken jobalardy iske asyrý, kadrlar daıarlaý máselelerine jiti nazar aýdardy.

Kezdesýde halyqaralyq qatynastardyń damýy, tájirıbe almasý, oqytý standarttaryn arttyrý - eńbek naryǵyndaǵy mamandarǵa degen suranystyń kepili ekeni aıtyldy. Shara sońynda ózara túsinistik jáne yqpaldastyq týraly qujattarǵa qol qoıyldy.

Aıta keteıik, búgingi tańda Dubai Port World kompanııasynyń ozat tehnologııalary men tájirıbesi Qazaqstanda «Qorǵas - Shyǵys qaqpa» jáne «Aqtaý teńiz porty» arnaıy ekonomıkalyq aımaqtaryn basqarý isinde qoldanylyp otyr.

Sondaı-aq Jahandyq ıslam ekonomıkalyq sammıti barysynda Dýbaı halyqaralyq qarjy ortalyǵynyń jáne Dýbaı Islam ekonomıkasyn damytý ortalyǵynyń basshylyǵymen kelissózder júrgizildi.