QR Qarýly kúshteriniń mýzeıine qaharmandardyń tarıhı jádigerleri tabys etildi (FOTO)

ASTANA. QazAqparat - Ataqty batyrlardyń, Uly Otan soǵysyna qatysýshylardyń urpaqtary, jeńimpazdardyń balalary men nemereleri QR Qorǵanys mınıstrliginiń usynysyna ún qatty jáne QR Qarýly Kúshteriniń jańa áskerı-tarıhı mýzeıiniń qoryna mádenı jáne ǵylymı qundylyqqa ıe biregeı tarıhı zattar men ata-babalarynyń qujattaryn berdi, dep habarlady QR Qorǵanys mınıstrliginiń baspasóz qyzmetinen.

«Men atam Ivan Vasılevıch Panfılovqa qatysty keıbir jádigerlerdi ákeldim. Bul kitap 1936 jylǵy basylyp shyqqan onyń jeke kitaphanasynan. Biraq, meniń oıymsha eń baǵalysy ol meniń atamnyń qaza bolǵan júrgizýshisine komıssar Logvınenkonyń bergen partbılettiń bir japyraq qaǵazy. Júrgizýshi soǵysta ony tumar retinde taǵyp júrip, óziniń partbıletin osy bir japyraq qaǵazda saqtap, keıinnen bizdiń otbasymyzǵa berdi. Sonymen qatar, 28 panfılovshylardyń ekeýine Keńes Odaǵynyń batyry ataǵyn berý týraly eki gramotanyń túpnusqalaryn, Baýyrjan Momyshulynyń qoltańbasy bar fotosýretti berdik. Odan basqa, Shymkentte qurylǵan 301-shi, 310-shy jáne 312-1-shi dıvızııalardan áskerı bólimderdiń, sondaı-aq 768-joıǵysh-avıatsııalyq polkiniń týlarynyń túpnusqalary biregeı bolyp tabylady. Bul 41-shi jylǵy soǵystaǵy týlar», - dep áńgimelep berdi Keńes Odaǵynyń batyry Ivan Panfılovtyń nemeresi Alýa Baıqadamova. Búgingi kúni mýzeıdiń kollektsııalyq qory ejelgi zamannan bastap qazirgi ýaqytqa deıingi qazaqstan halqynyń áskerı tarıhy men mádenıetiniń eskertkishterin áspetteıtin sırek jáne biregeı eksponattardan turady. Armııa generaly, táýelsiz Qazaqstannyń birinshi Qorǵanys mınıstri, Keńes Odaǵynyń batyry, Halyq Qaharmany Saǵadat Nurmaǵambetovtiń de otbasy mýzeıdiń tarıhı qoryna óz úlesin qosty. «Mýzeıdiń ashylatynyn bile salysymen biz atamyzdyń formasyn qýana-qýana berdik. Bul paradtyq kıim nysany, ol kıimmen atamyz elimizde ótetin anaǵurlym mańyzdy is-sharalarǵa qatysatyn. Ol kıim Keńes Odaǵynyń batyry, Halyq Qaharmany juldyzdarynyń telnusqalary men qalǵan ordender men medaldarǵa arnalǵan planka. 80-inshi jyldary tigilgen paradtyq fýrajka, depýtat kýálikteriniń túpnusqalary, pogondar, etikter. Sondaı-aq, biz qujattardy, sırek fotosýretterdiń túpnusqalaryn, onyń kitaptaryn, syılyqqa beriletin qylyshty, qylyshtyń júzderin berdik. Nurmaǵambetovterdiń otbasy sııaqty biz úshin munda ózimizdiń vıtrınamyzdy usyný úlken abyroı. Mýzeı óte qajet, sebebi, urpaq sabaqtastyǵyn jalǵastyrýdy júzege asyrýǵa, jas býynǵa tálim-tárbıe berýge, mádenı-adamgershilik deńgeıdi arttyrýǵa kómektesedi», - dedi batyrdyń nemeresi Saýyq Nurmaǵambetov. KSRO-nyń Halyq ártisi ataǵyn ıemdengen qazaqstandyqtar arasyndaǵy Uly Otan soǵysyna qatysqan dara áıel Roza Baǵlanovanyń jeke zattary da dál osy mýzeıdiń jádigerine aınaldy. Ártisterdiń brıgadasy quramynda ol aldyńǵy shepte Qyzyl áskerdiń jaýyngerleri aldynda óner kórsetip júrdi. Onyń maıdandyq kontsertteri sátti ótti. 1945 jyldyń 9 mamyrynda Roza Baǵlanova Berlındegi Jeńis kontsertine qatysty. «Kez kelgen mýzeı óziniń jádigerimen qundy. Balalardyń, nemerelerdiń, urpaqtyń qujattardy, zattardy berýi óte durys sheshim. Sebebi, mýzeıdiń negizgi jumysy osy eksponattardy saqtaý men dáripteý, olardy konservatsııalaý jáne qaıta jasaý, sondaı-aq osy materıaldy zerdeleý. Biz bul týraly barlyǵy, barsha Qazaqstan, árbir oqýshy, ózin áskerı iske sarp etken árbir adam bilgenin qalaımyz», - dedi mýzeı dırektory Asqar Qasymov.