QR Qarýly Kúshteriniń basshylyǵy myqty ári tózimdi ekenderin dáleldedi

ASTANA. QazAqparat - Astanada Qazaqstan Qarýly Kúshteriniń basshylyq quramy dene daıarlyǵy boıynsha normatıvter tapsyrdy, dep habarlady QazAqparatqa QR Qorǵanys mınıstrliginiń baspasóz qyzmetinen.

«Oqý-ádistemelik jıyndar sheńberinde QR Qorǵanys mınıstrligi Armııa ortalyq sport klýbymen Qazaqstan Qarýly Kúshteriniń basshylyq quramynan dene daıarlyǵynyń normatıvterin qabyldaý júrgizdi», - delingen taratylǵan habarlamada.

 

Qazaqstandyq armııanyń úsh júzden asa áskerı bólim komandıri, departament, bas basqarma, basqarma bastyqtarynyń dene daıarlyǵynyń deńgeıine baǵa berý árbir normatıvtegi belgilengen deńgeılerdi eskere otyryp, dene jattyǵýlaryn oryndaǵany úshin alǵan upaı qorytyndysy boıynsha  aıqyndaldy.

Aǵymdaǵy jyldyń basynan Qarýly Kúshterde áskerı qyzmetshilerdiń  dene daıarlyǵyn uıymdastyrýǵa negizgi talaptar men kózqarastar qaıta qaralǵanyn aıta ketken jón. Sonymen, trenajerlyq zaldaǵy sabaqtardyń sany eki esege ulǵaıtylyp, jas ereksheligi toptarynyń shegi keńeıtildi. Budan buryn dene daıarlyǵy sabaqtaryna tartylatyn áskerı qyzmetshilerdiń joǵary jasy 45 jasty quraǵan bolatyn. Qazirgi ýaqytta barlyq jeke quram tartylǵan.  Bir sózben aıtqanda, áskerı qyzmetshi «sapta» bolǵansha, júktelgen jaýyngerlik tapsyrmalardy sapaly oryndaý úshin ol sportpen shuǵyldanyp, dene symbatyn shynyqtyrýy tıis.