QR Qarýly Kúshteriniń áskerı-patrıottyq ortalyǵynda «Máńgilik el» monýmenti ashyldy
Іs-sharanyń qurmetti qonaqtary QR Qorǵanys mınıstrliginiń basshylyǵy, QR Parlamenti Májilisiniń depýtattary, QR QK-niń áskerı qyzmetshileri men olardyń otbasy músheleri, sondaı-aq, jastar uıymynyń ókilderi, elorda turǵyndary men qonaqtary boldy.
Merekelik kontsert bastalmas buryn Qazaqstan Respýblıkasynyń Qorǵanys mınıstri general-polkovnık Sáken Jasuzaqov áskerı-patrıottyq ortalyqta «Máńgilik el» monýmentin saltanatty túrde ashty. Sonymen qatar, munda fotokórme, Berel Memlekettik tarıhı-mádenı murajaı-qoryǵy men Qazaqstan sýretshiler Odaǵy músheleriniń kartınalary kórmesi usynyldy.
Dál 1 jeltoqsan kúni QR Qarýly Kúshteriniń Ulttyq áskerı-patrıottyq ortalyǵy óziniń qurylǵandyǵynyń bir jyldyǵyn atap ótedi. Týra bir jyl buryn bul kúni Elbasy - QR QK Joǵarǵy Bas Qolbasshysy Nursultan Nazarbaev osynaý mádenı oshaqty saltanatty túrde ashqan bolatyn. Bir jyl ishinde QR Qarýly Kúshteriniń Ulttyq áskerı-patrıottyq ortalyǵy áskerı-patrıottyq tárbıe berý men qazaqstandyq jastarǵa bilim berýdiń ordasyna aınaldy.
Búgingi tańda onyń quramynda kontserttik zal, Qorǵanys mınıstrliginiń Ortalyq áskerı orkestri jáne Ortalyq ansambli jumys istep tur. Ortalyqtyń mańyzdy bóligi ejelgi dáýirden bastap jáne qazirgi ýaqytqa deıingi Qazaqstan halqynyń áskerı tarıhy men mádenıetiniń eskertkishteri shoǵyrlanǵan Qarýly Kúshterdiń Áskerı-tarıhı murajaıy bolyp tabylady.
Bir jyl ishinde oǵan 36 000-nan asa adam keldi. Mýzeı birneshe zaldardan turady. Atap aıtqanda, QR Qarýly Kúshteriniń zaly, Merzimdi kórmeler zaly, HІH ǵasyrdyń Kóne zaly, XX ǵasyrdaǵy áskerı tarıh zaly, XX-XXI ǵasyrlardaǵy qarý-jaraq zaly, Sýret óneri zaly, sondaı-aq, «Qazaqstannyń áskerı isi tarıhy» atrıýmy bar.
Qazirgi ýaqytta murajaı qorynda shamamen 10 000 jádiger bar jáne tolyǵýda. QR QK-niń áskerı qyzmetshileri men ardagerleri, 1941-1945 jyldardaǵy Uly Otan soǵysynyń qatysýshylary men batyrlardyń týma-týystary, lokaldi soǵysqa qatysýshylar, sondaı-aq, jeke kollektsıonerler tarıhtyń sırek kezdesetin jádigerlerimen bólisýde. Sonymen birge, mýzeı ózindik arheologııalyq qyzmetin damytýda.