QR Qarýly Kúshteriniń áskerı qyzmetshileri Jeńistiń 70 jyldyǵyna arnap júzýden saıys uıymdastyrdy

ASTANA. QazAqparat - QR Qorǵanys mınıstrligi Armııa Ortalyq sport klýbynyń áskerı qyzmetshileri jáne olardyń otbasy músheleri alty komanda quramynda Astanadaǵy «Saryarqa» sport kesheninde ótken júzýden jarysqa qatysty.

Bul týraly QR Qorǵanys mınıstrliginiń baspasóz qyzmetinen habarlady.

Atalmysh is-shara Uly Otan soǵysyndaǵy Jeńistiń 70 jyldyǵy men «Armııa ortalyq sport klýby - Sport komıtetiniń» qurylǵanyna 23 jyl tolý qarsańynda uıymdastyrylyp otyr. Jarys qorytyndysy boıynsha «Arystan» toby eń jaqsy kórsetkishter kórsetip, jeńiske jetti. Atalmysh topqa Sport komıtetiniń tóraǵasy - QR QM AOSK bastyǵy polkovnık Erlan Talasbaev basshylyq etti. Kúmis júldeni «Búrkit» toby jeńip aldy, qola júldege «Jolbarys» toby ıe boldy. Júzý - áskerı qyzmetshilerdiń dene daıarlyǵynan tapsyratyn basty normatıvterdiń biri ekenin aıta ketken jón. Osyǵan baılanysty, júzý basseıni men sport keshenderine aqysyz barý uıymdastyrylǵan. Búgingi tańda bizdiń elimizde sportpen shuǵyldanýǵa barlyq jaǵdaılar jasalǵan. Qysqy ýaqytta shańǵy men konkı tebýshilerge bazalar men muzaıdyny jasalýda, jazda velosıped, rolıkti konkılerdi jalǵa beretin pýnktter ashylýda. Áskerı qyzmetshiler men olardyń otbasy múshelerin sportqa baýlý isinde sporttyń áskerı-qoldanbaly túrinen bastap ulttyq túrlerine deıin saıystar úlken úles qosýda.