QR Qarýly kúshteriniń áskerı qyzmetshileri Abaı oblysyndaǵy órtti sóndirýge jumyldyryldy

ASTANA. QazAqparat - Abaı oblysyndaǵy «Semeı ormany» tabıǵı rezervatyna jaıylǵan órtti sóndirýge QR Qarýly kúshiniń áskerı qyzmetshileri jumyldyryldy, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Tótenshe jaǵdaılar mınıstrliginiń málimetinshe, Reseıdiń Altaı ólkesinde qýraǵan shóptiń tutanýynan bastalǵan órt Abaı oblysyndaǵy «Semeı ormany» tabıǵı rezervatyna taraǵan. Órttiń jalpy aýdany 1500 ga qurady.
Qorǵanys mınıstri general-polkovnık Rýslan Jaqsylyqovtyń nusqaýy boıynsha órtke qarsy sharalardy oryndaýǵa arnaıy daıyndyǵy bar «Shyǵys» óńirlik qolbasshylyǵynyń kelisimshart boıynsha júzden asa ofıtseri men áskerı qyzmetshisi jumyldy.

Sonymen qosa 29 birlik áskerı avtokólik jáne ınjenerlik tehnıka (ámbebap jol mashınalary jáne basqa da órt sóndiretin quraldar) tartyldy.

Aýdandy barlaý, sondaı-aq órtti tikeleı sóndirý arnaıy aspamen 3,5 tonna sý tasıtyn «Bembı» qurylǵysymen jabdyqtalǵan Mı-17 kóliktik-jaýyngerlik tikushaǵy arqyly júzege asyrylýda.

Jeke quram orman órtiniń eki oshaǵyn sóndirýmen aınalysýda.

Birinshisinde, lokalızatsııalanǵan ýchaskede jumys júrgizilýde, ekinshisinde, qashyqtaǵy jerde qorǵanys jelisi qurylýda.

Áskerı qyzmetshiler arnaıy tehnıkamen aǵashtardy qulatyp, úıindiler salý ústinde.

Órt sóndirý jumystary «Shyǵys» óńirlik qolbasshylyǵynyń tyldyq qamtamasyz etý basqarmasy shtabynyń bastyǵy polkovnık Erjan Esenbaevtyń basshylyǵymen júrgizilip jatyr.

Qarýly kúshterdiń bólimsheleri jedel shtabpen udaıy baılanysta.