QR Qarýly Kúshterinde Zymyran áskerleri jáne artıllerııa kúni atap ótilýde (FOTO)

ASTANA. QazAqparat - Búgin Qazaqstannyń Qarýly Kúshterinde kóne ásker tekteriniń biri Zymyran áskerleri men artıllerııa kúni atap ótilýde. 1940 jyly «soǵys qudaıy» retinde beınelengen bul ásker túri Uly Otan soǵysynyń shaıqas alańynda óziniń maqsatyn oryndap shyqty. Barlyq operatsııalarda derlik artıllerııa eń basty tapsyrmalardy oryndap, qarsylasty qyryp-joıýdyń negizgi atys quraly boldy, dep habarlady QR Qorǵanys mınıstrliginiń baspasóz qyzmeti.

«Zymyran áskerleri men artıllerııa QR QK-niń jekelegen ásker tegi retinde 2003 jylǵy 7 mamyrdaǵy QR Prezıdentiniń Jarlyǵymen quryldy. Qurlyq áskerleriniń negizgi atys kúshi bolyp tabylady, qarsylasty atyspen qyryp-joıýda tapsyrmalardyń negizgi kólemin oryndaıdy», - deıdi QR QK Zymyran áskerleri men artıllerııanyń qolbasshysy polkovnık Lut Álshekenov.

Bul ásker túriniń ereksheligi olardyń birqatar aıqyn artyqshylyqtary, ıaǵnı, oraǵytýshylyq, soqqylardyń joǵary dáldigi, olardy jasaý jedeldigi, jyldyń ýaqytynan, táýliginen, aýa raıynan jáne ózge de jaǵdaılardan atys tıimdiliginiń eleýli emes táýeldiligi. «Biz kez kelgen aýa raıyna tótep beremiz, jańbyrǵa, jaýyn-shashynǵa qaramaımyz, bizge toıtarys berý qıyn. Biz damımyz dep úmittenemin. Bizdiń qazirgi ýaqyttaǵy basty mindetimiz - ol artıllerııanyń atysyn basqarýdyń avtomatty júıesi, ıaǵnı, pármenderdi berý dáldigi, onyń shapshańdylyǵy adamǵa emes, tehnıkaǵa táýeldi bolýy qajet. Nysanany kórip, 10-15 sekýndtan keıin atysty bastaısyń. Buǵan biz tyrysatyn bolamyz. Artıllerııalyq zeńbirekterimiz ben zymyrandarymyz qazirgi ýaqytta kez kelgen tapsyrmany oryndaýǵa qabiletti», - dedi polkovnık Lut Álshekenov.

Artıllerııaǵa jas ofıtserleri Qurlyq áskerleri Áskerı ınstıtýtynyń bazasynda daıarlanatynyn atap ótken jón. Al tehnıkany jańartý birtindep júrgiziledi. «Artıllerııalyq bólimder men bólimshelerdiń jaraqtandyrýda ártúrli tıptegi jáne kalıbrli artıllerııalyq zeńbirek bar. Atap aıtsaq, reaktıvti artıllerııa, sondaı-aq áreket etýi boıynsha snarıadtar men mınalar. Artıllerııanyń alys qashyqtyqqa áreket etetin zeńbirekteri, gaýbıtsalary, reaktıvti qondyrǵylary, tankige qarsy zeńbirekteri, mınaatqyshtary bar. Bul quraldardyń barlyǵy qysqa merzimde atysty bastaýǵa qabiletti, motoatqysh bólimshelerimizdi úzdiksiz alyp júredi. Jańartý birte-birte júrip keledi. Osy jyly biz barlyq eskirgen 82 mm mınaatqyshtardy tolyq aýystyrdyq, artıllerııanyń atysyn basqarýdyń avtomattandyrylǵan júıesi aıasynda jańartý júrgizilýde. Bıylǵy jyly biz súıretiletin artıllerııaǵa arnalǵan atysty basqarýdyń avtomattandyrylǵan jańartylǵan keshenin aldyq», - dedi QR QK Zymyran áskerleri men artıllerııanyń qolbasshysy polkovnık Lut Álshekenov.

Soynmen birge, Zymyran áskerleri men artıllerııanyń áskerı qyzmetshileri QR Qarýly Kúshterinde ótkiziletin barlyq oqý-jattyǵýlarǵa qatysady.