QR Qarýly Kúshterinde úsh tildi meńgergen áskerı qyzmetshiler anyqtaldy

ASTANA. QazAqparat - QR Prezıdenti Nursultan Nazarbaevtyń «Úsh tuǵyrly til» jobasy aıasynda Qorǵanys mınıstrliginde «Til sheberi-2018» baıqaýy ótti, dep habarlaıdy QazAqparat.

Sharada 21-29 jas aralyǵyndaǵy áskerı qyzmetshiler qazaq, orys jáne aǵylshyn tilderin bilýden baq synady. Baıqaý tanystyrý, ultty taný jáne ónertaný kezeńderinen turdy.

Qatysýshylar úsh tildi meńgerý deńgeılerin kórsetýmen qatar, Qazaqstan tarıhy, qazirgi zaman óneri men mádenıeti jaıyndaǵy suraqtarǵa da jaýap berdi. Qazylar alqasy jaýaptardyń jyldamdyǵyna, sapasyna jáne mazmunyna mán berdi.

Baıqaý qorytyndylary boıynsha QR Qorǵanys mınıstrligi Kadet korpýsynyń aǵa serjanty Naryn Áshimov jeńimpaz atandy. Ekinshi oryndy QR Qorǵanys mınıstrligi Aqparat jáne kommýnıkatsııalar departamentiniń bólim bastyǵy kapıtan Jansaıa Omarova ıelense, úshinshi orynǵa QR Qorǵanys mınıstrligi Qarý-jaraqty baqylaý jáne ınspektsııalyq qamtý ortalyǵynyń bólim ofıtseri leıtenant Dıas Óserbaev turaqtady.