QR Qarýly Kúshterinde alǵash ret jaýyngerdiń tolyq jaraqtandyrylýymen shańǵy jarysy ótti (FOTO)
QR QM Ortalyq apparaty, QR QK Bas shtaby, bas basqarmalary, ortalyqtary, Aqmola óńirlik garnızonynyń áskerı bólimderi men mekemeleriniń 300-ge jýyq áskerı qyzmetshisi 40 komanda quramynda qatardaǵy jaýynger, serjanttar men ofıtserler quramyndaǵy erler men áıelder medaldar men kýboktardy jeńip alýǵa baq synasty.
«Shańǵy daıarlyǵy jaýyngerlik daıarlyq baǵdarlamasyna kiredi. Biz shańǵyda júgiremiz, oq atamyz. Shańǵy daıyndyǵy áskerı qyzmetshilerdiń jaýyngerlik daıarlyǵynyń ajyramas bóligi bolyp qalýy tıis. Barlyqtaryńyzǵa saıysta sáttilik, jeńis tileımin», - dep QR Qorǵanys mınıstriniń birinshi orynbasary - QR QK Bas shtabynyń bastyǵy general-polkovnık Sáken Jasuzaqov sportshylarǵa tilegin bildirdi.
Sport komıtetiniń tóraǵasy - Armııa ortalyq sport klýbynyń bastyǵy Aıtalap Qorǵambaevtyń aıtýynsha, jaýyngerdiń tolyq jaraqtandyrylýymen mundaı shańǵy jarysy Qazaqstanda alǵash ret ótkizilip otyr. Birneshe saǵat buryn saıysqa qatysýshylar 3 ret júgirip ótti. Onyń árqaısysynda úsh kóshbasshy aıqyndaldy. Alǵashqy júgirýde birinshi oryndy Astana qalasynyń Qorǵanys isteri jónindegi departamentiniń komandasy, ekinshi júgirýde birinshi oryndy QR QK Áskerı polıtsııasy bas basqarmasy, úshinshi júgirýde 68665 áskerı bóliminiń áskerı qyzmetshileri altyn medaldi qanjyǵalady. Jalpy komandalyq esepte týrnırdiń bas júldesin 68665 áskerı bóliminiń komandasy jeńip aldy.
«Garnızon arasynda biz birinshi oryndy ıelendik, óte qýanyshtymyz. Komandamyz myqty ári tatý. Biz bul jarysqa daıyndaldyq, jeńiske ábden laıyqtymyz», - dep atap ótti jeńis tuǵyrynan kóringen komandanyń áskerı qyzmetshisi serjant Janna Qalıbekova.
Armııalyq shańǵyda júgirý QR Qarýly Kúshteri ofıtserleriniń, kelisimshart boıynsha áskerı qyzmetshileriniń, áıel áskerı qyzmetshilerdiń dene daıarlyǵynyń deńgeıin arttyrý, olardyń sporttyq sheberlikteri men áskerı-kásibı daıyndyǵynyń deńgeıin kóterý maqsatynda ótkizildi. Qazaqstandyq armııada dene daıarlyǵy jaýyngerlik daıarlyqtyń negizi bolyp tabylady. QR QK-niń ofıtserleri men kelisimshart boıynsha áskerı qyzmetshileri udaıy negizde prezıdenttik test, aı saıyn dene daıarlyǵy boıynsha normatıvter tapsyrady. Al jyldyń sońynda qorytyndy tekseriste ózderiniń kórsetkishterin rastaıdy.