QR ІІM janyndaǵy Qoǵamdyq keńestiń tóraǵasy saılandy

ASTANA. QazAqparat - Qazaqstan Respýblıkasynyń «Qoǵamdyq keńes týraly» Zańyna sáıkes QR Іshki ister mınıstrligi janyndaǵy Qoǵamdyq keńesiniń birinshi otyrysy ótti. Oǵan baıqaý nátıjeleri boıynsha saılanǵan Keńes músheleri, atap aıtqanda, kórnekti qoǵam qaıratkerleri, ǵylymı jáne quqyqtyq ortanyń, buqaralyq aqparat quraldarynyń, úkimettik emes uıymdardyń jáne azamattyq qoǵamnyń ókilderi qatysty. Bul týraly vedomstvonyń baspasóz qyzmetinen habarlandy.

«Qoǵamdyq keńestiń tóraǵasy bolyp ǵylymı-quqyqtyq ortanyń kórnekti ókili Marat Qoǵamov saılandy. M.Qoǵamov búginde Qazaq gýmanıtarlyq zań ýnıversıteti janyndaǵy Qylmystyq-protsestik zertteýler jáne sybaılas jemqorlyqqa qarsy is-qımyl ǵylymı-zertteý ınstıtýtynyń dırektory, zań ǵylymdarynyń kandıdaty, professor», - delingen baspasóz baıanynda.

Qoǵamdyq keńes otyrysynda Іshki ister mınıstri Qalmuhanbet Qasymov Elbasynyń tıimdi qoǵamdyq keńesti qurý jáne bılik qyzmetindegi teris áreketterge qarsy turýda onyń rólin arttyrý týraly aıtqanyn atap ótti.

«Bul týraly «Memleket basshysy N. Nazarbaevtyń bes ınstıtýtsıonaldyq reformasyn iske asyrý týraly «100 naqty qadam» Ult Josparynda tapsyrmalar berilgen. Onda ortalyq memlekettik jáne jergilikti atqarýshy organdardyń osy qyzmetiniń jańa formaty belgilendi», - dedi mınıstr.

Sonymen qatar, jıynda zań shyǵarmashylyǵy qyzmeti máseleleri jónindegi komıssııany qurý týraly sheshim qabyldandy. Atalǵan komıssııa azamattardyń quqyqtary, bostandyqtary men mindetterine qatysty mınıstrlik ázirleıtin normatıvti quqyqtyq aktilerdiń jobalaryn qarastyratyn bolady. Sondaı-aq, komıssııa ІІM-de joldanǵan azamattardyń ótinishterin, polıtsııa jumysynyń ashyqtyǵyn qamtamasyz etýge baǵyttalǵan máselelerdi de qaraıtyn bolady. Jıyn barysynda Keńestiń prezıdıýmy jáne ІІM Qoǵamdyq keńesi týraly erejeniń jobasy bekitildi.