QR ІІM merekelerge oraı jumys rejimin kúsheıtti
20:48, 06 Mamyr 2019
NUR-SULTAN. QazAqparat - Aldaǵy merekelerge baılanysty Іshki ister mınıstrligi qaýipsizdik sharalaryn kúsheıtti, dep habarlaıdy QazAqparat tilshisi.
6-12 mamyr aralyǵynda ishki ister organdarynyń jeke quramy kúsheıtilgen rejimde jumys isteıtin bolady.
Kóshelerde narıadtardyń sany artyp, merekelik sharalar ótetin oryndarǵa, halyq jappaı seıil quratyn aýmaqtarǵa basa kóńil bólinbek. Qalalarda «Batyrlarǵa taǵzym» atty sherýler ótetindikten, polıtsııa qyzmekterleri atalmysh sharaǵa qatysýshylardyń qaýipsizdigin qadaǵalaıtyn bolady.
«ІІM jol qozǵalysyna qatysýshylardan sherý kezinde baratyn baǵyttaryn kúni buryn josparlap, apattar men keptelisterdiń aldyn alýdy suraıdy. Qoǵamdyq tártipti buzyp, mádenı sharalardyń shyrqyn ketirý áreketterine polıtsııa Qazaqstan Respýblıkasynyń zańnamasyna sáıkes sharalar qabyldaıtyn bolady» - delingen ІІM baspasóz qyzmetiniń habarlamasynda.