QR ІІM komıteti tóraǵasynyń orynbasary qyzmetinen qýyldy

ASTANA. QazAqparat - Qylmystyq atqarý júıesi komıteti tóraǵasynyń birinshi orynbasary Bekbolat Tóremuratov qyzmetinen qýyldy. Bul týraly QR Іshki ister mınıstriniń keńesshisi - resmı ókil Nurdildá Oraz aıtty, dep habarlaıdy QazAqparat tilshisi.

Onyń aıtýynsha, 6 naýryzda Batys Qazaqstan oblystyq prokýratýrasynyń vedomstvoaralyq jedel tergeý toby oblystyq polıtsııa departamenti Ózindik qaýipsizdik basqarmasymen birge QR ІІM Qylmystyq atqarý júıesi komıtetiniń birinshi orynbasary Bekbolat Tóremuratovty ustaǵan.

«Atalǵan fakti boıynsha mınıstrlikte qyzmettik tekserý júrgizilip, onyń nátıjesi ІІM tártiptik komıssııasynyń otyrysynda qaraldy. Tóremuratov qyzmettik tártipti óreskel buzǵany, quqyq qorǵaý organdaryna kir keltiretin áreket jasaǵany úshin QR Іshki ister mınıstri Erlan Turǵymbaevtyń buıryǵymen ishki ister organdarynan shyǵaryldy. Sonymen qatar onyń tikeleı bastyǵy Qylmystyq atqarý júıesi komıtetiniń tóraǵasy qatań tártiptik jaýapkershilikke tartyldy», - dedi N.Oraz.