QR ІІM ınternet alaıaqtardyń portretin sıpattap berdi

ASTANA. QazAqparat – Qazaqstanda ınternet-alaıaqtyq fatkileri azaıyp keledi. Bul týraly Іshki ister mınıstrliginiń ókili Shuǵyla Turlybek aıtty, dep habarlaıdy QazAqparat tilshisi.

«Jyl basynan elimizde 9 myńnan astam ınternet-alaıaqtyq tirkelgen. Qylmystardyń tómendeý dınamıkasy baıqalady», - dedi Shuǵyla Turlybek.

ІІM deregi boıynsha, ınternet-alaıaqtyq baǵytynda qaýip tóndiretinder –psıhologııalyq turǵydan jaqsy daıyndalǵan 25-45 jas aralyǵyndaǵy erler men áıelder.

«Olar sheteldik uıymdasqan qylmystyq toptardyń músheleri bolyp keledi jáne TMD-da ornalasqan táýelsiz «sall-ortalyqtarda» jumys isteıdi. Olar «kelissóz júrgizýshiler», «hakerler» jáne «IT-mamandar» bolyp, ózara rólderdi bólisip, qylmystyq áreketterin júzege asyrady jáne kóp jaǵdaıda Qazaqstannan tys jerlerde ornalasady», - dedi vedomstvo ókili.

Osy baǵyttaǵy kúresti kúsheıtý úshin barlyq óńirde «CyberPol» bólimsheleri – arnaıy toptar qurylyp otyr.

«Bólimsheler quramyna jedel ýákilder, tergeýshiler jáne krımınalıster endi. Olar «bir tereze» qaǵıdaty boıynsha jumys isteıdi. Bul bank sektorymen jáne uıaly baılanys operatorlarymen ózara is-qımyl jasaýǵa múmkindik beredi.

Beıindi bólimshelerdi zamanaýı baǵdarlamalarmen jáne tehnıkamen qamtamasyz etý máselesi pysyqtalýda. Almaty akademııasynda mamandardy daıarlaý boıynsha kıberortalyq ashylyp, onda 350 qyzmetker oqytyldy», - dedi Shuǵyla Turlybek.