QR ІІM-de 1,4 myń basshylyq laýazym qysqartyldy

NUR-SULTAN. QazAqparat – Polıtsııa qyzmetin baǵalaýdyń jańa júıesi engizildi. Bul týraly halyqqa esep berý kezdesýinde QR Іshki ister mınıstri Erlan Turǵymbaev aıtty, dep habarlaıdy QazAqparat tilshisi.

«Іshki ister organdaryn reformalaý boıynsha júrgizilip jatqan jumysty erekshe atap ótkim keledi. 2018 jyly Elbasy Nursultan Ábishuly Nazarbaevtyń bastamasymen 3 jylǵa arnalǵan Jol kartasy qabyldandy. Ol boıynsha mynadaı nátıje bar: qyzmetkerlerdiń shtattyq sany 13,5 myńǵa qysqardy; 106 basqarý bólimderi men 1483 basshylyq laýazymdar taratyldy», - dedi mınıstr.

Onyń atap ótýinshe, búginde polıtseılerdiń sany 100 myń turǵynǵa shaqqanda 471-den 369-ǵa deıin azaıdy.

«Bul eýropalyq eldermen sáıkes keledi. Ákimshilik shyǵyndar azaıdy. Jumys úshin qajetti jaǵdaılar jasaldy: áleýmettik qorǵaý, turǵyn úı jaǵdaılary jaqsardy, qyzmetkerlerdiń jalaqysy kóterildi. Qyzmetkerlerdi oqytý júıesý qaıta qaraldy. Qyzmetke qabyldaý talaptary kúsheıdi. Polıtsııa qyzmetin baǵalaýdyń jańa júıesi engizildi. Endi polıtsııanyń jumysyna halyq baǵa beredi. Táýelsiz ınstıtýttar áleýmettik zertteýler júrgizip, qaýipsizdik deńgeıi jáne halyqtyń polıtsııaǵa senimi boıynsha baǵalaıdy», -dedi Erlan Turǵymbaev.