QR Energetıka mınıstrligi Jaqsalıevtiń úıqamaqqa alynýyna qatysty túsinik berdi
Mınıstlik B.Jaqsalıevke resmı qabyldanǵan sharaǵa qatysty aqparattan habarsyz ekendigin málim etti.
«QR Energetıka mınıstrligi Jemqorlyqqa qarsy is-qımyl ulttyq bıýrosynyń vıtse-mınıstr B.Jaqsalıevtiń úıqamaqqa alynýy týraly resmı habarlamasyna baılanysty júrgizilgen jedel is-sharalar boıynsha qandaı da bir naqty sharanyń qabyldanǵany týraly aqparaty joq ekendigin habarlaıdy. Vedomstvo óz qyzmetinde elimizde qabyldanǵan jemqorlyqqa qarsy kúres sharalaryn ustanatyndyǵyn jáne onyń kez kelgen kórinisine nóldik tózimdilik qaǵıdatymen qaraıtynyn málimdeıdi», - delingen mınıstrlik aqparatynda.
Vedomstvo málimetinshe, mınıstrlik qyzmetkerleri arasynda jemqorlyqqa qarsy is-qımyl týraly zańnama normalaryn túsindirý sharalary turaqty júrgiziledi. Máselen, 2017 jyly mınıstrlik pen onyń aýmaqtyq bólimshelerinde jemqorlyq táýekelderdi ishki saraptaý (11 ret), jemqorlyqqa qarsy monıtorıng (10), is-sharalar júrgizilip (58), jemqorlyqqa qarsy standarttar (7) ázirlengen. 2017 jyldyń qorytyndysynda mınıstrlik qyzmetkerleri tarapynan jemqorlyq quqyq buzýshylyq tirkelmegen.
Buǵan deıin habarlaǵanymyzdaı, QR Energetıka vıtse-mınıstri Baqytjan Jaqsalıev para alý kúdigine ilikti. Ol úıqamaqqa alyndy.
Memlekettik qyzmet isteri jáne sybaılas jemqorlyqqa qarsy is-qımyl agenttiginiń málimetinshe, ol Şýchınsk-Býrabaı kýrorttyq aımaǵyndaǵy kóldi tazartý boıynsha jumystardy qabyldaý barysynda zańǵa qaıshy áreketterge barǵan. Jaqsalıev oryndalǵan jumystyń kólemi 30 ese artyq baǵalanǵanyn bile otyryp, jalpy somasy 863 mln teńgeni quraıtyn sý qoımasynyń túbinen 109 myń tekshe metr shógindilerdi alý týraly aktilerge qol qoıyp, atalǵan somany merdigerge aýdarǵan.
Aıta keteıik, bul, jemqorlyq kúdigi boıynsha ustalyp otyrǵan Energetıka mınıstriniń ekinshi orynbasary. Aǵymdaǵy jyldyń 2 naýryzy kúni Astana qalasynyń №2 Almaty aýdandyq soty vıtse-mınıstr Ǵanı Sádibekovke eki aıǵa qamaýda ustaý túrindegi bultartpaý sharasyn qoldaný týraly sheshim shyǵardy. Keıin qamaýda ustaý túrindegi bultartpaý sharasy úıqamaqqa aýystyryldy.
Ǵ. Sádibekovke «Aımaq» JShS merdigerlik uıymynyń basshysy D. Dýanbekpen sóz baılasyp, Şýchınsk-Býrabaı kýrorttyq aımaǵyndaǵy kóldi tazartýǵa bólingen asa iri mólsherdegi bıýdjet qarajatyn jymqyrdy degen aıyp taǵylyp otyr. Qylmysqa Energetıka mınıstrliginiń departament basshysy J. Nurbekov jáne merdiger uıymnyń ókilderi S. Jumalınov jáne B. Qadyrberlın de qatysqan.