QR Energetıka mınıstrligi aǵymdaǵy jylǵy munaı óńdeý josparymen bólisti

ASTANA. QazAqparat - QR Energetıka mınıstrligi 2016 jyly munaı óńdeý kólemin qysqartýdy josparlap otyr. Bul týraly búgin QR Energetıka vıtse-mınıstri Áset Maǵaýov málim etti.

«Biz shamamen 14,9 mln. tonna munaıdy qaıta óńdedik. Ótken jyly birneshe faktorlarǵa oraı qaıta óńdeý tómendetilgen edi. Birinshi kezekte ol Reseıde rýbldiń qunsyzdanýyna balıanysty oryn aldy jáne kóptegen reseılik munaı ónim ónimderi bizdiń naryqqa endi. Sondyqtan biz qaıta óńdeý kólemin tómendettik. Sonymen qatar osy jyly úsh zaýytta shamamen 14 mln. tonna munaı óńdeý josparlanýda», - dedi ol.

Onyń aıtýynsha, elimizdegi munaı ónimderi naryǵyndaǵy ahýal turaqty.

«Biz teńgerimge sáıkes Reseıden 1,2-1,3 mln. tonna benzın ımporttaımyz. Dızel otynyn jylyna 400-500 tonna alamyz, negizinen qystyq dızel otyny. Qazirgi qaıta óńdeletin kólem ishki naryq qajettiligin jabýǵa jetkilikti desek te bolady», -  dedi Á.Maǵaýov.

Vıtse-mınıstrdiń sózine qaraǵanda, aǵymdaǵy jyly Qazaqstan 2,76 mln. tonna benzın óndirýdi josparlaýda. «Basqa munaı ónimderi boıynsha uqsas dınamıka baıqalady. Biz mazýt óndirýdiń jalpy kólemi tómendep otyrǵanyn baıqaýdamyz jáne ol 1,5 mln. tonnaǵa deıin quldyraıdy. Bul bizdiń zaýyttardyń jańǵyrtylyp jatqandyǵyna baılanysty», - dedi ol.