QR Energetıka mınıstri qazaqstandyq munaıshylarǵa úndeý aıtty

ASTANA. QazAqparat - QR Energetıka mınıstri Qanat Bozymbaev kezekti ret elimizdegi benzın naryǵyndaǵy jaǵdaıǵa túsinikteme berdi, dep habarlaıdy QazAqparat.

«Úsh kúnnen keıin Pavlodar munaı óńdeý zaýyty iske qosylady. Meniń oıymsha, qazaqstandyq beznınniń ótkizilýi esebinen baǵa boıynsha jaǵdaı qalpyna keletin bolady. Qazannyń sońyna qaraı baǵa boıynsha aıtyp beremiz»,-dedi mınıstr.

Osy oraıda ol qazan aıynda elimizde AI-92 benzıniniń 40 paıyzdan astamy reseılik ónimge tıeseli ekenin eske salyp ótti. Al benzınniń bul markasy Reseıde qymbattaý.

«Sondyqtan ol bizdegi ortasha baǵaǵa áser etti. Qarasha aıynda reseılik benzınniń úlesi tómendeıdi degen oıdamyz», - dedi Bozymbaev.

Sonymen qatar QR Energetıka mınıstri qazaqstandyq munaıshylarǵa óziniń úndeýin jetkizdi.

«Endi benzınniń basym bóligi qazaqstandyq úleske tıesili bolady. Qarashada biz munaıshylarmen jaqsy jumys isteýimiz kerek, ıaǵnı olar munaı óńdeýshi zaýyttarmen birge ózderiniń tábetin basýy qajet», - dedi Bozymbaev.