QR Ekologııa mınıstri: Kishi Araldyń ekologııasy jaqsaryp keledi

NUR-SULTAN. QazAqparat - QR Ekologııa, geologııa jáne tabıǵı resýrstar mınıstri Maǵzum Myrzaǵalıev elimizdiń ońtústik óńirlerine jumys sapary aıasynda Qyzylorda oblysynda boldy.

Sapar barysynda óńir basshysy Gúlshara Ábdiqalyqovamen birge Kishi Aral bógetin kórdi, dep habarlaıdy QazAqparat tilshisi.

«Elimizdiń ońtústik óńirinde jumys saparymen júrmin. Keshe Qyzylorda oblysynyń ákimi G.Ábdiqalyqovamen Kishi Aralǵa baryp qaıttym. Soltústik Araldaǵy ahýaldy jaqsartýda Kókaral bógetiniń qurylysy úlken ról atqardy jáne búginde ol jaqtaǵy sý kólemi 27 tekshe shaqyrymǵa jetti. Óńirdiń ekologııasy jaqsaryp, balyq sharýashylyǵy qarqyndy damý ústinde. Sý qoımasynda tirshilik etetin balyqtyń 20-dan astam túri bar»,- dep jazdy mınıstr Twitter paraqshasynda.

Onyń atap ótýinshe, bógettiń strategııalyq mańyzy bar jáne onyń jaı-kúıin baqylaýǵa alyp, únemi kútip ustaý qajet.

«Osy maqsatta bógetti nyǵaıtý jumystaryn júrgizý josparlanǵan, jobalyq-smetalyq qujattamasy ázirlenip jatyr. Joba taıaý keleshekte júzege asyrylatyn bolady jáne nysandy jańǵyrtý barysynda jumys oryndaryn ashýǵa múmkindik beredi», - dedi Maǵzum Myrzaǵalıev.