QR DSM resmı ókili ózine bir top áıeldiń kúsh kórsetý oqıǵasyna qatysty pikir bildirdi
«Ózim qyzmet etken jyldary kóptegen qıyn jáne qyzý sátterge tap boldym, tipti jaǵdaı kúrdelenip, qaqtyǵys bastalyp keterdeı kórinetin. Biraq, biz óz biliktiligimizge jáne taraptardyń syndarly dıalogqa múddeli bolýyna baılanysty qashanda mundaı jaǵdaılardan aýlaq bola aldyq.
Al búgin meni arsyzdyǵymen jáne ashý-yzasymen qaıran qaldyrǵan oqıǵa boldy. Joq, maǵan qatysty emes, men er adammyn jáne bir-eki áıel úshin shaǵymdaný jaraspaıdy. Meni kópbalaly analardyń, onyń ishinde múgedektigi bar balalardy tárbıelep otyrǵan analardyń týra sondaı múgedek adamǵa, Densaýlyq saqtaý mınıstrliginiń qoǵamdyq qabyldaý bólmesindegi qyzmetker qyzǵa degen qarym-qatynasy tań qaldyrdy», - dep jazdy Erjan Baıtanaev Facebook jelisinde.
Onyń aıtýynsha, áıelder ǵımaratqa basa-kóktep kirip, kinásiz qyzmetkerge, múmkindigi shekteýli adamǵa agressııa kórsetken. Qyzmetkerdiń olarǵa kómektesýge tyrysqany úshin de til tıgizip, kúsh qoldana bastaǵan.
«Osy áıelderdiń ashýyna tap bolǵan múmkindigi shekteýli qyz sııaqty balalardy tárbıelep otyrǵan analardyń qatygezdigine qaıranmyn. Eger olar osyndaı qorǵansyz adamǵa kúsh kórsete alsa, múgedekterdiń quqyqtaryn qorǵaýdy talap etýi ekijúzdilik bolyp shyqpaı ma? Múmkindigi shekteýli adamǵa analardyń agressııa kórsetýi durys pa?
Biz árqashan dıalogqa jáne tıisti reaktsııaǵa, tyńdaýǵa, kómektesýge, ymyraǵa kelýge daıynbyz, óıtkeni biz zaıyrly jáne quqyqtyq memlekette ómir súrip jatyrmyz. Men barlyq azamattardy sanaly bolýǵa shaqyramyn! Eger sizde qandaı da bir suraqtar nemese máseleler týyndasa, biz árdaıym kelissózder ústeline otyrýǵa jáne agressııa men qorlaýǵa júginbesten olardy ashyq sheshýge daıynbyz. Elimizdiń árbir azamatynyń ıgiligi men densaýlyǵy úshin ári qaraı jyljımyz!» - dedi E. Baıtanaev.
Aıta keteıik, áleýmettik jelide Densaýlyq saqtaý mınıstrligi ǵımaratynda shý shyǵarǵan áıelder týraly beınejazba taraǵan edi. Jazbada bir top áıeldiń mınıstrlik ókilderine bas salǵanyn kórýge bolady.