QR DSM: Qordaıdaǵy oqıǵadan zardap shekkenderdiń barlyǵyna medıtsınalyq kómek kórsetiledi
«Qazir Memleket basshysynyń tapsyrmasy boıynsha Masanchı aýylynda Úkimettik komıssııa jumys isteýde. Jedel medıtsınalyq kómek kórsetý úshin oqıǵa ornyna shuǵyl túrde mamandar toby jáne shuǵyl medıtsınalyq kómek brıgadalary jiberildi. 100-den astam medıtsına qyzmetkeri men 36 sanıtarlyq kólik, onyń ishinde 2 sanıtarlyq avıatsııa tikushaǵy tartyldy» dep habarlaıdy QR DSM baspasóz qyzmeti.
10 aqpandaǵy málimetke sáıkes, jappaı janjal saldarynan 178 adam zardap shekti, 10 adam qaza tapty (8 - oqıǵa ornynda, aýyr jaraqat alǵan 2 adam aýrýhanada).
Mınıstrlik málimetine saı, medıtsınalyq kómekke 170 adam júgindi. Ótinish bildirgenderdiń: 117-sine ambýlatorlyq kómek – (102 - Qazaqstanda, 15 Qyrǵyz Respýblıkasynda); 53 adamǵa statsıonarlyq kómek - (43 – Qazaqstan, 10 – Qyrǵyz Respýblıkasynda) kórsetildi.
10 aqpan saǵat 12.00-degi jaǵdaı boıynsha statsıonarlyq emdelýde 41 naýqas bar: Almaty qalasynyń statsıonarlarynda – 25; Jambyl oblysynda – 14; Qyrǵyz Respýblıkasynyń statsıonarlarynda – 2. Onyń ishinde: reanımatsııada 9, beıindi bólimshelerde túrli jaraqat alǵan 32 patsıent bar. 17 naýqasqa ota jasaldy.
Aıta ketý kerek, búgin, ıaǵnı, 10 aqpanda Qordaıdaǵy aýdandyq ortalyq aýrýhanada 1 patsıentti jáne Qyrǵyz Respýblıkasynan 2 patsıentti Almaty qalasynda tasymaldaýǵa daıyndyq júrgizilýde.
Patsıentterge medıtsınalyq kómektiń barlyq túri men kólemi Tegin memlekettik kepildendirilgen kómek boıynsha kórsetiletinin atap ótý qajet.
Qazir naýqastar mamandardyń jiti baqylaýynda jáne qajetti em alýda.