QR DSM qashyqtan medıtsınalyq qyzmet kórsetý týraly buıryqtyń jobasyn talqylaýǵa shyǵardy

<p>QR Densaýlyq saqtaý mınıstrligi ashyq normatıvtik quqyqtyq aktiler men qoǵamdyq uıymdardyń portalynda talqylaý úshin qashyqtan medıtsınalyq qyzmetter kórsetý týraly buıryqtyń jobasyn ázirlep, shyǵardy.</p>

Bul týraly Kazinform mınıstrliktiń baspasóz qyzmetine silteme jasap habarlaıdy.

Qujattyń osy jobasyna sáıkes («Ambýlatorııalyq jaǵdaılarda mamandandyrylǵan medıtsınalyq kómek kórsetý qaǵıdalaryn bekitý týraly» Qazaqstan Respýblıkasy Densaýlyq saqtaý mınıstriniń 2022 jylǵy 27 sáýirdegi № QR DSM-37 buıryǵyna ózgerister) patsıentter beıindi dárigerden alǵashqy konsýltatsııany oflaın formatta alady, al qaıtalama konsýltatsııalardy qashyqtan ala alady.

Búgingi tańda 13 medıtsınalyq qyzmet, mysaly, ıntegratsııasy bar jáne ıntegratsııasyz telepatologııa jabdyǵynyń kómegimen skanerlengen gıstologııalyq preparattarǵa dárigeriniń konsýltatsııasy, psıholog, reabılıtolog logoped, dárigerlerdiń qashyqtyqtan konsılıýmy jáne basqa qyzmetter qashyqtan kórsetiledi.

Buıryq jobasymen atalǵan tizbe 67 konsýltatsııaǵa jáne 48 medıtsınalyq qyzmetke deıin ulǵaıtyldy. Bul dıagnostıkalyq zertteýlerdi aıqyndaýǵa, nevropatolog, kardıolog, psıhıatr, endokrınolog, psıhıatr, gınekolog sekildi arnaıy mamandardyń konsýltatsııalaryna, EKG, MRT, mammografııa, rentgenografııa, qan qysymyn kúndelikti baqylaý, elektroentsefalogramma, polısomnografııaǵa jáne basqalarǵa qatysty.

Qashyqtyqtan qyzmet kórsetý patsıentterge qaıtalama qabyldaý kezinde dárigerge barmaı-aq konsýltatsııa alýǵa, emdeýdi ýaqtyly bastaýǵa, dıagnozdy naqtylaýǵa, emdeý boıynsha usynystar alýǵa, dárilik preparatty taǵaıyndaýǵa múmkindik beredi.

Qashyqtan tehnologııalar búkil álemde keńinen qoldanylady, halyqqa medıtsınalyq kómektiń qoljetimdiligin arttyrady, sondaı-aq mamandarǵa kezekti aıtarlyqtaı azaıtady.

Densaýlyq saqtaý mınıstrligi buıryqtyń jobasyna usynystardy qaraýǵa jáne talqylaýǵa daıyn.