QR DSM: 2019 jylǵa tegin dári-dármekterdi satyp alý bastaldy

ASTANA. QazAqparat - Medıtsınalyq uıymdar qazaqstandyqtar úshin 2019 jyly tegin medıtsınalyq qyzmetterdi kórsetýge qajet bolatyn dári-dármekterge ótinish bildire bastady, dep habarlaıdy QR Densaýlyq saqtaý mınıstrliginiń baspasóz qyzmeti.

 QR Densaýlyq saqtaý mınıstrligi Farmatsııa komıtetiniń tóraıymy Lıýdmıla Bıýrabekovanyń aıtýynsha,tegin dári-dármek úshin satyp alynatyn dáriler men medıtsınalyq buıymdardyń tizimi 1144 joldan turady. Oǵan dárilerdiń 829 ataýy men 315 medıtsınalyq buıym kirgen.

«Bıyl 45 aýrý boıynsha dıspanserlik esepte turǵan naýqastardy emhanada emdeý úshin dári-dármekterdiń 550-den astam ataýy bekitildi. Ótken jyly dál osyndaı maqsatta 482 ataýmen dári-dármekter satyp alynǵan», - dedi Lıýdmıla Bıýrabekova.

«SK-Farmatsııa» JShS basqarmasy tóraǵasynyń mindetin atqarýshy Berik Shárip satyp alý protsedýrasy barlyq preparattar biryńǵaı dıstrıbıýtordyń qoımasyna ústimizdegi jyldyń sońyna deıin túsý úshin qajet ekenin aıtady.

«Tenderlik protsedýralar eki aıdaı ýaqytty alady. Tenderdiń nátıjeleri boıynsha kelisim sharttar jasalyp, dári-dármekter qoımalarymyzǵa jyldyń aıaǵynda túsetin bolady», - dedi B. Shárip.

Biryńǵaı dıstrıbıýterdiń aıtýynsha, preparattardy alýǵa jiberilgen ótinishter birden bekitilmeıdi. Aýrýhanalar men emhanalar «SK-Farmatsııamen» kelisim jasaý kezinde ótinishterge taǵy bir márte túzetýler engize alady.

«SK-Farmatsııa» JShS basshysy bıylǵy jyly dári-dármek pen medıtsınalyq baǵyttaǵy buıymdardy satyp alý alǵash ret elektrondyq formatta júrgiziletinin aıtty.