QR DSÁDM sarapshylary kadrlar tapshylyǵyn anyqtaý maqsatynda 6 myń jumys berýshige saýalnama júrgizdi

ASTANA. QazAqparat - QR DSÁDM Jumyspen qamtý problemalary jónindegi aqparattyq-taldaý ortalyǵynyń (ári qaraı - JP ATO) sarapshylary «Atameken» Ulttyq kásipkerler palatasymen birlese otyryp, respýblıka aımaqtary men salalardaǵy kadrlar tapshylyǵyn anyqtaý maqsatynda jumys berýshilerge saýalnama júrgizdi, dep habarlaıdy vedomstvonyń baspasóz qyzmetinen.

Qazirgi tańda 6 myńǵa jýyq kásiporyn basshylary saýalnamadan ótti. Jalpy alǵanda 8 myńnan astam jumys berýshilerdi qamtý josparlanyp otyr, saýalnama qorytyndysy aǵymdaǵy jyldyń sáýir aıynda belgili bolmaq.

2016 jyldyń birinshi toqsanynda JP ATO mamandary 2021 jylǵa deıingi eńbek naryǵyndaǵy tapshy mamandardyń bes jyldyq boljamyn ázirleý jumysyn aıaqtaýdy josparlap otyr.

Sonymen, 2015 jyly alǵashqy ret mamandyqtary men kásibine qaraı kadrlar tapshylyǵyn anyqtaý úshin 3700-den astam jumys berýshilerge saýalnama júrgizildi. Onyń nátıjesinde jumys berýshilerdiń 95% suranysyna tómengi jáne orta biliktilik mamandaryna saı keledi. Sonymen birge, bos oryndardy toltyrý tapshylyǵyn sezinip otyrǵan 90%-ǵa jýyq kásiporyn basshylary mundaı sáıkessizdikti qajetti bilikti mamandardyń bolmaýymen nemese olardyń biliktiliginiń tómen deńgeıimen baılanystyrady.

JP ATO málimetinshe, álemdik betalystarǵa saı, bolashaqta Qazaqstanda joǵarǵy bilikti mamandarǵa suranys arta túsetin bolady. Degenmen, jumyspen qamtylǵan azamattardyń negizgi bóligi qyzmet kórsetý salasynda bolmaq. Bul aýylsharýashylyq salasyndaǵy jumyspen qamtý kórsetkishin tómendetkende jáne óndiristegi turaqty jumyspen qamtý bolǵanda ǵana júzege aspaq.

Sondaı-aq, aımaqtardaǵy halyq sanynyń úlǵaıýy birkelki bolmaıdy. Onjyldyq sońyna qaraı, aǵymdaǵy betalystardy saqtaǵan jaǵdaıda eńbek naryǵynyń aımaqtardaǵy úılesimsizdigi artady dep kútilýde. Eńbek suranysy men usynystary arasyndaǵy aıyrmashylyq Soltústik Qazaqstan, Qostanaı, Shyǵys Qazaqstan oblystarynda jumys kúshiniń jetispeýshiligin, al Ońtústik Qazaqstan, Qyzylorda, Mańǵystaý oblystarynda kerisinshe, onyń artýyn týyndatady.

Qazirgi tańda QR DSÁDM eńbek naryǵyndaǵy úılesimsizdikti joıý úshin qajetti sharalardy qabyldaýda. Onyń ishinde halyqtyń eńbek mobıldiligin arttyrý (azamattardy jumys kúshi mol aımaqtan jumys kúshi jetispeıtin aımaqtarǵa kóshirýdi yntalandyrý), sonymen birge, kadrlardy daıyndaý men qaıta daıarlaý júıesinde birqatar sharalar ótkizilýde.