QR DSÁDM-de memlekettik qyzmetterdi úkimettik emes uıymdarǵa berý máseleleri talqylandy

ASTANA. QazAqparat - Búgin QR Densaýlyq saqtaý jáne áleýmettik damý mınıstrliginde Mınıstr Tamara Dúısenovanyń basshylyǵymen selektorlyq tártipte «Memlekettik organdardyń densaýlyq saqtaý salasyndaǵy úkimettik emes uıymdarmen zamanaýı jaǵdaıda ózara árekettesýi: aǵymdaǵy jaǵdaı, damý máseleleri men perspektıvalary. Memlekettik qyzmetterdi úkimettik emes sektorǵa berý» taqyrybynda jıyn ótti, dep habarlady vedomstvonyń baspasóz qyzmeti.

Sharaǵa QR DSÁDM jáne Densaýlyq saqtaýdy damytý respýblıkalyq ortalyǵynyń basshylyǵy, «Atameken» QR Ulttyq kásipkerler palatasynyń, Qazaqstandyq densaýlyq saqtaý qyzmetkerleriniń salalyq kásipodaǵynyń, Ulttyq densaýlyq saqtaý palatasynyń, Respýblıkalyq medıtsınalyq palatasynyń, «Qazaqstan FarmMedIndýstrııa» farmatsevtıkalyq jáne medıtsınalyq ónimder óndirýshileri birlestiginiń, Qazaqstandyq jeke medıtsınalyq qurylymdar birlestiginiń, «Medıtsınalyq qyzmetkerler quqyǵyn qorǵaý» qoǵamdyq birlestiginiń ókilderi, sonymen qatar, kásibı birlestikter (barlyǵy 79 ÚEU), QR DSÁDM shtattan tys bas mamandary qatysty.

Jıynda klınıkalyq hattamalardy jasaýdaǵy, praktıkalyq densaýlyq saqtaý salasyndaǵy mamandar men túlekterdiń bilimi men mashyǵyn táýelsiz baǵalaýdaǵy, densaýlyq saqtaý salasy mamandaryn úzdiksiz kásibı damytý men qosymsha bilim berýdegi kásibı birlestikterdiń roli; memlekettik qyzmetterdi densaýlyq saqtaý salasynyń úkimettik emes sektoryna berý kezindegi kásibı birlestikterdiń kúshin nyǵaıtý qajettiligi; medıtsınalyq qyzmet kórsetýdiń sapasyn ulǵaıtýdaǵy patsıentterdi qorǵaıtyn  beıkommertsııalyq uıymdardyń róli jáne t.b. talqylandy. Sondaı-aq, densaýlyq saqtaý júıesinde jumys isteıtin ÚEU problemalary men perspektıvalaryna basa nazar aýdaryldy.

Otyrysty qorytyndylaı kele, Kásibı birlestikter jáne ÚEU keńesin qurý sheshimi qabyldandy. Atalǵan keńes úkimettik emes sektorǵa beriletin memlekettik qyzmetter tizimin jasap, bekitetin bolady, sonymen qatar, alǵa qoıǵan maqsatty júzege asyrý boıynsha Jol kartasyn jasaıdy.