QR-daǵy saılaýdy baqylaý jónindegi qoǵamdyq komıssııa bıýdjeti shamamen 30 mln. teńgeni quraıdy

ASTANA. QazAqparat - «Qazaqstan Respýblıkasyndaǵy saılaýdy baqylaý jónindegi respýblıkalyq qoǵamdyq komıssııa» respýblıkalyq qoǵamdyq birlestiginiń bıýdjeti shamamen 30 mln. teńgeni quraıdy. Bul týraly búgin atalǵan birlestiktiń tóraǵasy Nurlan Erimbetov málim etti.

«Bizdiń bıýdjetimiz shamamen 20-30 mln. teńge mólsherinde belgilengen. Degenmen, bul bıýdjettiń basym bóligi baıqaýshylardyń quqyqtary men mindetteri kórsetilgen arnaıy nusqaýlyq shyǵarýǵa jumsalady. Sonymen qatar biz ózimizdiń baıqaýshylarymyzǵa arnap, shaǵyn beıne rolık te shyǵaratyn bolamyz», - dedi ol.

Onyń atap ótýinshe, budan bólek bıýdjet shyǵystaryna komıssııa músheleriniń óńirlerge issapar shyǵyndary, birkúndik tamaqtanýy jáne uıaly baılanys qońyraýlaryna arnalǵan shyǵystar kiredi.

«Bul kóp qarjy emes. Biz árbir baıqaýshyǵa 3 myń teńgeden tóleımiz. Qazirgi ýaqytta bizdiń is-áreketimizge qoldaý bildirgisi keletin azamattarmen baılanysqa shyǵýdamyz ári kómek bergisi keletin adamdar da bar. Óz isimizdi erteń eshqandaı aıyptaýlar bolmaıtyndaı shynaıy nıetpen atqarǵymyz keledi», - dedi N.Erimbetov.