QR Bilim jáne ǵylym mınıstri ustazdar qaýymyna alǵys aıtty
«Qymbatty áriptester! Sizderdi kásibı merekelerińiz – Muǵalimder kúnimen shyn júrekten quttyqtaımyn. Muǵalim mamandyǵy búkil álemdegi eń qurmetti, eń asyl mamandyqtyń biri. Sizder balalardy bilim nárimen sýsyndatyp, olarǵa tálim-tárbıe berý barysynda, ıaǵnı elimizdiń damýyna baǵa jetpes úles qosyp kele jatyrsyzdar. Óıtkeni muǵalim balalardy bilim álemine jeteleıdi ári keıingi býyn ókilderin tárbıeleıdi», - dedi mınıstr.
Onyń aıtýynsha, pandemııa muǵalim jumysynyń mańyzdylyǵyn aıqyndap bergen.
«Ata-analar balalardy oqytý qanshalyqty qıyn ekenin túsinip, sezinip, muǵalimniń oqýshy ómirinde mańyzdy oryn alatynyna taǵy da bir márte kóz jetkizdi dep aıta alamyn. El Prezıdenti Qasym-Jomart Kemeluly Toqaevtyń qoldaýynyń arqasynda muǵalimderdiń jalaqysy artyp, jańa qosymsha aqylar men sanattar paıda boldy. Biz muǵalimderdi ózine tán emes fýnktsııalardan jáne qaǵazbastylyqtan aryltý úshin júıeli ári naqty sharalar qabyldadyq. Pedagog mártebesin kóterý boıynsha ári qaraı da jumysty jalǵastyramyz», - degen vedomstvo basshysy bıyl táýelsizdiktiń 30 jyldyǵy ekenin eske saldy.
«Osy ýaqyt aralyǵynda elimizde aıtarlyqtaı úlken-úlken ózgerister boldy. Bilim berý júıesi de ózgerdi. Bilimimizdi shyńdap, jańa daǵdylardy ıgerdik. Bul jetistikterge qol jetkizýde bizdiń áriptesterimiz – muǵalimderdiń eńbegi men kásibıliginiń úlesi óte zor. Qymbatty áriptester, sizderdi kásibı merekelerińizben quttyqtap, zor densaýlyq, sarqylmas kúsh-qýat, shabyt, shyǵarmashylyq tabys tileımin. Qymbatty áriptester! Qajyrly eńbekterińiz, shydamdylyqtaryńyz jáne balalarǵa degen súıispenshilikterińiz úshin alǵys aıtamyn. Mereke qutty bolsyn», - dedi Ashat Aımaǵambetov.