QR Bilim jáne ǵylym mınıstri A.Sárinjipov azamattardy jeke qabyldaý ótkizdi
Qoǵamdyq qabyldaýǵa kelgenderdiń biri Astana qalasynyń turǵyny Záýre Qarsybaeva jumysqa turý máselesine baılanysty aryzyn aıtty.
«Men uzaq ýaqyt L.N.Gýmılev atyndaǵy Eýrazııa ulttyq ýnıversıtetinde uzaq ýaqyt oqytýshy bolyp jumys istedim. Magıstratýra baǵdarlamasy boıynsha shet elde oqý grantyn jeńip alǵanyma baılanysty jumystan ketýime týra keldi. Endi jumysqa tura almaı júrmin»,- dep shaǵymdandy Záýre Qarsybaeva. Aryzdanýshyny tyńdap shyqqan Aslan Sárinjipov onyń shaǵymyn joǵary oqý orny basshylyǵyna joldaýǵa ýáde berdi. Mınıstrge kelgen Meıram Qabdyrahmanuly óz qyzynyń Nazarbaev ýnıversıtetine alynýyna yqpal etýin surap ótinish jasady. «Meniń qyzym malaızııalyq ýnıversıtetterdi birinde ekinshi kýrsta oqıdy. Oqytýshylar onyń oqý úlgeriminiń jaqsy ekenin aıtady. Otbasylyq jaǵdaıymyzǵa baılanysty biz ony qazaqstandyq jetekshi joǵary oqý ornyna aýystyrǵymyz keledi», - degen qalaýyn bildirdi Meıram Qabdyrahmanuly. Oǵan jaýap bergen A.Sárinjipov ár ýnıversıtettiń bazasynda atalǵan máselelerdi retteıtin qabyldaý komıssııasynyń jumys isteıtinin aıtty. Qabyldaýǵa kelgen Gúlfaırýz Qaldybaeva onyń ýnıversıtettegi dıplomynyń qaıtarylýyna yqpal etýin surady. «Ekinshi joǵary bilim alý maqsatynda men M.Tynyshpaev atyndaǵy kólik jáne kommýnıkatsııalar akademııasyna qujat tapsyrdym. Alaıda oqý úshin aldyn-ala tólem jasaı almaǵanym úshin ýnıversıtet ákimshiligi dıplomymdy maǵan qaıtarýdan bas tartýda», - dedi ol. Óz kezeginde mınıstr qaramaǵyndaǵy qyzmetkerlerine qalyptasqan ahýaldy sheshýge yqpal etýge tapsyrma berdi.