QR BǴM Jas ǵalymdar keńesiniń alǵashqy otyrysyn ótkizedi

NUR-SULTAN. QazAqparat – QR Bilim jáne ǵylym mınıstrligi janyndaǵy Jas ǵalymdar keńesiniń alǵashqy otyrysy ótedi. Bul týraly mınıstrliktiń basshysy Ashat Aımaǵambetov málim etti, dep habarlaıdy QazAqparat tilshisi.

«QR Bilim jáne ǵylym mınıstrligi ashyq saıasat júrgizip keledi. Biz jas ǵalymdardy shaqyryp, Jas ǵalymdar keńesin qurýdy uıǵardyq. Oǵan 40 jasqa deıingi tanymal ǵylym ókilderin qostyq. Bul keńestiń aıtarlyqtaı salmaqty ókilettigi bolady. 10 tamyz kúni keńestiń alǵashqy otyrysyn ótkizemiz», - dedi Ashat Aımaǵambetov elordada «Burabay Forum» jas ǵalymdar forýmynyń ashylýynda tilshilerge bergen suhbatynda.

Onyń aıtýynsha, Jas ǵalymdar keńesine 30 ǵalym engen. Sáıkesinshe, olardy túrli úkimettik emes jáne ǵylymı uıymdar usyna alady.

«Qazir 2025 jylǵa deıingi bilim berý men ǵylymdy damytý jónindegi baǵdarlamany ázirlep jatyrmyz. Bul jumystar aıasynda kóptegen jastar men muǵalimderdi shaqyrdyq. Jalpy alǵanda, bul organ ǵylymdy damytýǵa belsendi kómektesedi dep oılaımyn. Keńes týraly ereje bekitildi. Úmitkerler sonda kórsetilgen belgili bir talaptarǵa sáıkes kelýi kerek», - dep atap ótti A. Aımaǵambetov.