QR BǴM komıteti kúni boıǵy jumysqa tartylǵan 14 jasóspirimdi anyqtady
Mınıstrlik málimetine sáıkes, jumys berýshiler eńbek shartyn jasamastan 14 jasóspirimdi jumysqa tartyp, olar kúni boıy eńbek etken.
Qazir elde balalar eńbegin qanaýǵa qarsy ulttyq aqparattyq naýqan ótkizilýde.
«Aqparattyq naýqan elimizdiń barlyq óńirinde júrgizildi. Túsindirý jumystary barysynda Túrkistan, Qaraǵandy jáne Aqmola oblystarynda balalar eńbegin zańsyz paıdalaný faktileri anyqtaldy. Dámhanada daıashy jáne qurylys alańdarynda jumysshy bolyp eńbek etken 14 jasóspirimniń quqyǵy buzyldy. Jumys berýshiler olardy zańsyz negizde tolyq jumysqa tartqan. Zań boıynsha 14 pen 18 jas aralyǵyndaǵy kámeletke tolmaǵandar úshin qysqartylǵan jumys ýaqyty belgilenýi kerek. Sondaı-aq jasóspirimdermen jáne olardyń ata-analarymen eńbek sharttary jasalmaǵan», – dedi QR BǴM Balalardyń quqyqtaryn qorǵaý komıtetiniń tóraǵasy Esenǵazy Imanǵalıev.
Balalardy eńbekke zańsyz tartý faktileri anyqtalǵannan keıin jumys berýshilermen jáne kámeletke tolmaǵandardyń ata-analarymen túsindirý jumystary júrgizildi.
Aıta keteıik, QR Eńbek zańnamasyna sáıkes, 14 jasqa tolǵan oqýshylarǵa oqýdan bos ýaqytta densaýlyǵyna zııan keltirmeıtin jumystardy oryndaýǵa ruqsat etiledi. 14-16 jas aralyǵyndaǵy balalar aptasyna 24 saǵattan, 16-18 jastaǵy jasóspirimder aptasyna 36 saǵattan artyq jumys istemeýi qajet. Bul rette, jumys berýshi kámeletke tolmaǵan balanyń ózimen, onyń ata-anasymen, qamqorshysymen nemese bala asyrap alǵan ata-anamen eńbek shartyn jasaýǵa mindetti.