QR Bas prokýrory kadrlar týraly: «Kim bolsa, sony alyp jatyrmyz»

ASTANA. QazAqparat - QR Bas prokýrory Jaqyp Asanov halyq tarapynan quqyq qorǵaý organdaryna qatysty týyndaǵan senimsizdik álsiz kadrlardyń sebebinen oryn alyp jatqandyǵyn atap ótti.

«Kim bolsa, sony alyp jatyrmyz, jaqynda burynǵy prokýror Sametov óziniń eski formasyn kıip alyp, bıznesmendi 3,5 mıllıon teńgege «laqtyryp» ketti. Osyndaı adam prokýratýrada 7 jyl qyzmet etti. Sonda qandaı adamdar qyzmetke alynyp jatyr? Basty sebep - irikteý júıesiniń solqyldaqtyǵy. Ol boıynsha, úmitkerlerdi baǵalaý múmkin emes, onyń jeke qasıetteri qandaı, ol da belgisiz kúıde nazardan tys qala beredi», - dedi ol búgin Bas prokýratýranyń jartyjyldyq qorytyndysyn shyǵarý kezinde.

Degenmen, keıingi jyldary prokýratýraǵa jumysqa qabyldaý barysynda jańa irikteý júıesi engizilgen. Endi úmitkerler ózderiniń ómirlik tájirıbeleri jaıynda jáne konkýrstyq komıssııa usynǵan taqyryptan eki esse jazyp, birqatar tapsyrmalar oryndaıdy, psıhologııalyq synaqtan ótedi. Nátıjesinde, olardyń IQ deńgeıleri anyqtalmaq. Sonymen qatar, úzdik 30 prokýrordyń pýly qurylmaq. Qyzmettegi memlekettik aıyptaýshylarǵa da talaptar kúsheıtilmek.