QR Bas prokýratýrasy saılaý naýqanyna baılanysty Úndeý jarııalady

NUR-SULTAN. QazAqparat - Qazaqstan Respýblıkasy Bas Prokýrorynyń orynbasary Marat Ahmetjanov bıylǵy jyldyń 9-shy maýsymyna taǵaıyndalǵan QR Prezıdentiniń kezekten tys saılaýyna baılanysty Úndeý jarııalady, dep habarlaıdy QazAqparat.

Úndeýdiń mátinin búgin Bas prokýratýranyń baspasóz qyzmeti jarııalady.

ÚNDEÝ

«Prokýratýra týraly» Qazaqstan Respýblıkasy
Zańynyń 31-baby tártibinde

Áleýmettik jelilerde jáne messendjerlerde 1 mamyrda ruqsat etilmegen mıtıngilerge qatysý jóninde shaqyrýlar taratylýda.

Bas prokýratýra ondaı aktsııalardy ótkizgen jaǵdaıda oǵan qatysqandardyń áreketteri beıbit jınalystar men mıtıngilerdi uıymdastyrý jáne ótkizý tártibi týraly zańdy buzý retinde saralanatynyn eskertedi.

Quqyq qorǵaý organdary quqyq buzýshylarǵa den qoıyp, olarǵa tıisti sharalar qoldanýǵa mindetti bolady.

Osyndaı aktsııalarǵa qatysýǵa shaqyrǵany, olardy uıymdastyrǵany, qatysqany úshin Ákimshilik quqyq buzýshylyq týraly kodekstiń 488-baby boıynsha jaýaptylyq týyndaıdy.

Egerde bul áreketter eleýli zardap keltiretin bolsa, onda kináli adam Qylmystyq kodekstiń 400-baby boıynsha jaýapqa tartylady.

«Bas prokýratýra, elimizdiń joǵarǵy qadaǵalaý organy retinde, azamattardy zańdy múltiksiz saqtaýǵa, arandatýǵa ermeýge jáne zańsyz aktsııalarǵa qatysýdan tartynýǵa shaqyrady»,-delingen habarlamada.