QR Bas prokýratýrasy «mámile tazalyǵyn» tekserý tetigin engizýdi usynady
Onyń atap ótýinshe, búgingi kúni elimizde «mámile tazalyǵyn» tekserý tetigi joq. Sondyqtan satyp alýshy múliktiń tarıhyn bilý múmkinshiliginen aıyrylyp otyr.
«Onyń mundaı múmkinshiligi joq. Ol aqshasyn tóleıdi, barlyq qajetti protsedýralardy múltiksiz oryndaıdy, memleketke tolyqtaı senedi. Notarıýs bolsa tek múliktiń menshik ıesin tekseredi. Satyp alýshyda qalǵan máselelerdi anyqtaýǵa quqyǵy da, múmkinshiligi de joq. Múlik daýly emes pe, onyń qazirgi qojaıyny kim, bul úı qalaı satyldy - munyń barlyǵyn da shyndap kelgende ol tekserýge mindetti emes», - dep atap ótti J.Asanov.
Bas prokýrordyń sózine qaraǵanda, damyǵan elderde ókiletti qurylymdar múliktiń barlyq mán-jaıyn tekserip shyǵady.
«Eger satyp alý protsessinde zańsyz faktiler nemese jalǵan málimetter anyqtalatyn bolsa, onda mámileni kýálandyrǵan ne tirkegen tulǵa jaýapkershilikke tartylady»,- dedi ol.
Osy oraıda J.Asanov Qazaqstanǵa da osyndaı tetik qajet ekendigin basa aıtty. «Mámile tazalyǵyn» tekserýdi rıeltorlarǵa, advokattarǵa nemese notarıýsterge júkteýge bolady. Eger biz jaýapkershilikti notarıýsqa júkter bolsaq, onda oǵan aqparattyq bazaǵa qol jetkizý múmkinshiligin berýimiz qajet. Ol máselen buǵan deıingi barlyq mámilelerde qaraýǵa, satýshynyń quqyqty ekendigine kóz jetkizýi tıis. Osyndaı tetik engizer bolsaq ol alaıaqtardyń qyzmetine tosqaýyl bolady», - dedi Bas prokýror.
Munan bólek ol saqtandyrý somasyn arttyrý, materıaldyq jaýapkershilikti naqty belgileý qajettigen basa nazar aýdardy.
«Reseıde eger bireý notarıýstyń qateliginen múlkinen aıyrylatyn bolsa, onda saqtandyrý kompanııasy oǵan 5 mln. rýbl, teńgemen 25 mıllıon teńge tóleıdi. Al bizde bul somasy 12 ese tómen, 2 mln. teńge ǵana. Bul aqshaǵa jataqhanadan bólme de satyp ala almaısyń», - dedi J.Asanov.