QR Bas prokýratýrasy qarjy pıramıdalarynyń qyzmetine qarsy is-qımyl máseleleri boıynsha zań jobasyn ázirledi

ASTANA. 28 qańtar. QazAqparat - Memleket basshysynyń tapsyrmasy boıynsha QR Bas prokýratýrasy Ulttyq Bankpen jáne ózge de múddeli organdarmen birlesip «Keıbir zańnamalyq aktilerge qarjy (ınvestıtsııalyq) pıramıdalarynyń qyzmetine qarsy is-qımyl máseleleri boıynsha ózgerister men tolyqtyrýlar engizý týraly» Zań jobasyn daıyndady.

Bul týraly joǵarǵy qadaǵalaý organynyń baspasóz qyzmetinen habarlady

Zań jobasynyń basty maqsaty, eń aldymen, elimizde qarjy pıramıdalarynyń jolyn kesý jáne jumys isteýine jol bermeýge, qarjy pıramıdalarynyń qyzmetimen baılanysty quqyqqa qaıshy áreketterden azamattardyń quqyqtary men zańdy múddelerin qorǵaýdyń kepildigin qamtamasyz etýge baǵyttalǵan quqyqtyq baza qalyptastyrý bolyp tabylady.

Álemdik jáne otandyq tájirıbe kórsetip otyrǵandaı, ekonomıkanyń damýy jáne turǵyndardyń qarjylyq jaǵdaıynyń aıtarlyqtaı ósýi qarjy pıramıdalary qyzmetiniń belsendiliginiń artýyna túrtki bolady.

Olardyń erekshelikteri sol, quıylǵan ınvestıtsııanyń kirisi árbir qosylýy yqtımal jańa salymshyǵa ózge de jańa salymshylardy jáne aqsha qarajatyn tartý esebinen tólenedi. Salymshylardyń bastapqylaryna keıingi klıentterdiń esebinen kóp tabys tóleýge ýáde bere otyryp, aqsha qarajatyn salýǵa ıtermeleıdi.

Osylaısha, pıramıdanyń «tómengi» jaǵyndaǵy kóptegen adamdar joǵarydaǵy azshylyqqa aqsha tóleıdi jáne olar ádette eshnársesiz qalady.

Biraq qarjy pıramıdasy josyqsyz jarnamalaý kómegimen syrttaı qaraǵanda eleýli kepildikteri bar senimdi joba bolyp kórinedi.

Zań jobasy Bas prokýratýranyń saıtynda ornalastyrylǵan.