QR Bas prokýratýrasy bolashaq zańgerlerdi memlekettik tilge kásibı deńgeıde úıretýdi usynady
Mundaı usynysty búgin Bas prokýratýra janyndaǵy zańdylyqty qamtamasyz etý boıynsha qoǵamdyq keńestiń otyrysynda QR BP kadr isi departamentiniń basshysy Roza Dosymbekova aıtty.
«Búginde joo-larda qazaq tilinen memlekettik emtıhan alynatynyn bilemiz, degenmen olar mektep deńgeıinde ǵana ótedi. Biraq biz QazGZÝ-men sóılesip, onda stýdentterdi memlekettik tilde kásibı túrde úıretýdi usyndyq. Stýdentter qazaq tilinen memlekettik emtıhan kásibı túrde ótip kelse, biz olardyń biliktiligin odan ári kóteremiz. Aǵylshyn tili týraly da osyny aıtýǵa bolady. Bizde qazir qazaqsha jáne aǵylshynsha kásibı deńgeıde sóıleıtin mamandar óte tapshy. Al eger stýdentterge birinshi kýrstan bastap osy tilder kásibı túrde úıretilse, olar bizge jumysqa turǵanda ońaıyraq bolady», - dedi ol. R.Dosymbekovanyń aıtýynsha, búginde «kásibı tildik ortaǵa kirigý» atty ınnovatsııalyq joba ázirlenip, «Prokýror entsıklopedııasy» atty sózdik shyǵaryldy.