QR Balalar onkogematologııalyq qyzmetine – 30 jyl
Onlaın jáne oflaın túrinde ótken halyqaralyq konferentsııa jumysyna Germanııa, Túrkııa, Reseı, Belarýs, Ózbekstan, Latvııa, Ýkraına, Tájikstan eliniń eń myqty onkolog-dárigerleri qatysty.
Sharaǵa sondaı-aq Astana jáne Almaty qalalaryndaǵy eki respýblıkalyq ǵylymı ortalyqtyń balalar onkologııasy men gematologııa salasynyń mamandary, oblystyq onkologtar men gematologtar, úkimettik emes uıymdar men ata-analar qaýymdastyǵynyń ókilderi, barlyǵy 500-den astam adam qatysty.
Konferentsııanyń basty maqsaty — balalar onkologııasy jáne gematologııasy salasyndaǵy ózekti máselelerdi talqylaý, halyqaralyq jáne aımaqaralyq baılanysty damytý, sheteldik mamandarmen tájirıbe almasý, qoǵamǵa bul aýrýlardyń kóptegen túriniń emdeletinin jetkizý, erte qaralyp, anyqtalyp turý qajet ekendigin eskertý.
«Balalardyń qaterli dertke shaldyǵýy qoǵam úshin úlken tragedııa. Sondyqtan 30 jyl buryn Pedıatrııa jáne balalar hırýrgııasy ǵylymı ortalyǵynyń bazasynda «KER-Germanııa» qaıyrymdylyq qoǵamynyń belsendi kómegimen Respýblıkalyq balalar onkogematologııalyq ortalyǵyn uıymdastyrý týraly sheshim qabyldandy. Kóp jyl boıy memleket tarapynan onkogematologııalyq aýrýlary bar balalarǵa kómek kórsetý máselelerine basa kóńil bólinip keledi. Onkologııalyq jáne gematologııalyq aýrýlary bar balalar dıagnostıka men emdeýdiń klınıkalyq hattamalaryna sáıkes barlyq dárilik zattarmen, onyń ishinde ambýlatorııalyq kezeńde respýblıkalyq bıýdjet esebinen qamtamasyz etiledi. Astana qalasyndaǵy Ana men bala ulttyq ǵylymı ortalyǵynda onkologııa jáne gematologııa bólimsheleri ashyldy. Gemopoezdik diń jasýshalaryn transplanttaý tehnologııalary sátti engizildi, QR-da balalar onkologııalyq jáne gematologııalyq kómegin jetildirý boıynsha jol kartalary ázirlenip, iske asyryldy. Bıyl onkologııalyq aýrýlarmen kúres boıynsha keshendi is-sharalar jospary ázirlendi. Sondaı-aq Densaýlyq saqtaý mınıstrligi erte dıagnostıka, mamandandyrylǵan emdeýdi jetildirý, joǵary tehnologııalyq qyzmetter spektrin keńeıtý, kadrlyq áleýetti jetildirý jáne ǵylymdy damytý jónindegi is-sharalardy iske asyrýdy kózdep otyr», – dedi densaýlyq saqtaý vıtse-mınıstri Vıacheslav Dýdnık.
Respýblıkalyq balalar onkogematologııalyq ortalyǵynyń ashylýymen elimizde balalar onkogematologııalyq qyzmetiniń jańa deńgeıi bastaldy. Osy tarıhı 30 jyl ishinde aıtarlyqtaı jetistikterge qol jetti. Atap aıtqanda, dıagnostıkanyń zamanaýı ádisteri jolǵa qoıyldy, baǵdarlamalyq hımıoterapııa jáne transplantatsııalaý tehnologııalary, ártúrli onkogematologııalyq aýrýlary bar patsıentterdi ońaltý jáne psıhologııalyq qoldaý sharalary engizildi. Professor Kúlıan Omarovanyń jetekshiligimen balalar onkologtary men gematologtarynyń otandyq ǵylymı mektebi quryldy, onda júzdegen onkogematolog mamandary daıarlandy. Qazirgi kezde olar elimizdiń barlyq óńirinde jáne shetelde de jumys isteıdi. Búginde qaterli dertke shaldyqqan balalar mektepte, ýnıversıtette oqýyn aıaqtaýǵa múmkindik aldy, maman ıesi, tabysty adam boldy. Bizdiń alǵashqy emdelýshilerimiz qazirgi tańda ata-ana atanyp, tolyqqandy qoǵamymyzdyń músheleri bolyp otyr. Onyń birqatary búgingi sharaǵa arnaıy kelip otyr», – dep atap ótti «Pedıatrııa jáne balalar hırýrgııasy ǵylymı ortalyǵy» AQ Basqarma tóraǵasy A.Qusaıynov.
Forým alańynda balalardyń qaterli isigin, qan aýrýlaryn emdeý salasyndaǵy ózekti taqyryptardyń keń aýqymy, balalyq shaqtaǵy onkologııalyq jáne gematologııalyq aýrýlardy dıagnostıkalaý men emdeýdegi zamanaýı tásilder, balalar onkologııasy men gematologııasyndaǵy hırýrgııanyń zamanaýı múmkindikteri, onkogematologııalyq qyzmetti uıymdastyrý jáne balalar onkologııasy men gematologııasy salasyndaǵy ózekti máseleler talqylandy.
Konferentsııa barysynda Qazaqstandaǵy balalar onkogematologııalyq qyzmetiniń ashylýy men damýyna ólsheýsiz úles qosqan dárigerler Alǵys hattarmen marapattaldy.
Búgingi tańda Pedıatrııa ortalyǵynda balalardaǵy barlyq qaterli isikterdi emdeý júzege asyrylýda, kórsetiletin medıtsınalyq qyzmetterdiń qoljetimdiligi men sapasy jaqsardy, memleket qyzmetti qarjylandyrýdy tolyq kólemde júzege asyrady. 2012 jyly balalarǵa gemopoezdiktiń jasýshalaryn transplantatsııalaý (GDJT) engizildi, búginde transplantatsııanyń barlyq túrleri júrgiziledi. Osy ýaqytqa deıin 177 GDJT jasaldy.