QR Áskerı-teńiz kúshteri «Admıral» jańa katerine ıe boldy

ASTANA. QazAqparat - Aqtaý teńiz portynda Armııa halyqaralyq oıyndary sheńberinde Mahachkalada teńiz bıatlony boıynsha saıysta ekinshi oryndy enshilegen «Saryarqa» jáne «Oral» zymyran artıllerııalyq korablderiniń ekıpajdaryn saltanatty túrde qarsy aldy.

QR Qorǵanys mınıstrliginiń baspasóz qyzmetiniń habarlaýynsha, QR Áskerı-teńiz kúshteriniń korablderi Reseı Federatsııasynyń sý aıdynynan jeńip alynǵan «Admıral» katerimen oraldy.

QR QK ÁTK-niń korablderi shildeniń 21-i men tamyzdyń 17-i aralyǵynda Reseı Federatsııasynyń sý aıdynynda boldy. Byltyrǵy jyly Qazaqstannyń teńizshileri ekinshi oryndy ıelenip, BL-80 katerin utyp alǵanyn aıta keteıik.

Teńizshilerdi saltanatty túrde qarsy alý QR QK ÁTK týynyń kóterilgen kúniniń 20 jyldyǵymen atap ótildi. Áskerı teńizshiler úshin bul kún ataýly kúnderdiń biri bolyp tabylady. Osy kúnge oraı, soǵys, Qarýly kúshter ardagerleri, oqýshylar men stýdentter úshin 29011 áskerı bóliminde ekskýrsııa uıymdastyrylyp, jańa áskerı tehnıkanyń kórsetilimi uıymdastyryldy. 

«Áskerı-teńiz kúshteriniń jeke quramy Kaspıı teńizinde Áskerı-teńiz týyn ári qaraı abyroımen kóterýdi jalǵastyryp, olarǵa qoıylǵan oqý jáne jaýyngerlik tapsyrmalardy oryndaý úshin barlyq kúsh-jigerlerin salatynyna  kámil senimdimin. Áskerı-teńiz týynyń kóterilýiniń 20 jyldyǵymen taǵy bir márte quttyqtap, dástúr boıynsha saparlaryńyz sátti bolsyn», - dep zapastaǵy kontr-admıral Kenjemergen Ábikeev óziniń lebizin bildirdi.

20 jyl buryn Aqtaý qalasynyń 4-shi yqsham aýdanynda 1-dárejeli kapıtan R. Islamov Táýelsiz Qazaqstannyń áskerı-teńiz týyn alǵash ret kótergenin esterińizge sala keteıik.