QR AShM bıyl jemis kóshetterin saqtandyrý júıesin qoldanysqa engizbek
Baspasóz qyzmetiniń málimetterine qaraǵanda, Aýyl sharýashylyǵy mınıstrligi júıeli túrde klımattyq jaǵdaıdy qadaǵalap otyrady jáne týyndaıtyn qaterlerdi joıý úshin barlyq qajetti sharalardy qabyldaıdy. Qazaqstannyń qatal jáne boljaýǵa kelmeıtin klımattyq jaǵdaılaryn udaıy nazarǵa alady.
Saqtandyrý aýyl sharýashylyǵy taýaryn óndirýshilerdiń múddelerin óndiristegi qaýipti oqıǵalardan qorǵaýdyń pármendi quraldarynyń biri bolyp tabylady.
Respýblıkada AÓK erikti saqtandyrý júıesi 2020 jyldan bastap kúshine endi. Baǵdarlama operatory - «Agrarlyq nesıe korporatsııasy» AQ.
Búgingi tańda ósimdik sharýashylyǵy salasynda dándi daqyldar (bıdaı, suly, arpa, júgeri), kúzdik jáne maıly daqyldar (kúnbaǵys, zyǵyr, raps) boıynsha saqtandyrý ónimderi engizildi, sonymen birge mal sharýashylyǵy salasynda ІQM, usaq mal, jylqy, qus salasy saqtandyrýǵa jatady.
Jemis ekpelerin saqtandyrýǵa qatysty aıtar bolsaq, bul saqtandyrý ónimi ótken jyly sheteldik kompanııalardyń birimen birlesip ázirlendi jáne Qazaqstanda testileýden ótti. Alaıda, testileý kezinde ázirlengen saqtandyrý óniminiń keıbir qatelikteri anyqtaldy, bul ony praktıkalyq iske asyrýǵa múmkindik bermedi.
Qazirgi ýaqytta Agrosaqtandyrý qaýymdastyǵy Germanııa-Qazaqstan agrarlyq-saıası dıalogymen, Swiss Re qaıta saqtandyrý uıymymen jáne Agroinsurance International kompanııasymen birlesip, ony jetildirý boıynsha belsendi jumys júrgizip jatyr.
Kópjyldyq derekter negizinde jasalatyn barlyq qajetti esepteýler aıaqtaldy jáne qaıta saqtandyrý uıymymen kelisýden ótip jatyr. Odan ótkennen keıin saqtandyrý ónimi jergilikti saqtandyrý kompanııalarymen pysyqtalatyn bolady.
Jemis kóshetterin saqtandyrýdy eki baǵyt boıynsha engizý josparlanyp otyr: egindi tabıǵı sıpattaǵy qubylystardan jáne aýrýlardan saqtandyrý, sondaı-aq kópjyldyq ekpelerdiń ózderin múlik retinde saqtandyrý.
«QR Aýyl sharýashylyǵy mınıstrligi Agrosaqtandyrý qaýymdastyǵymen birlesip, osy baǵytta jumys isteýde jáne aǵymdaǵy jyly jemis ekpelerin saqtandyrýdy engizý josparlanyp otyr»,-delingen habarlamada.